O PSdeG acusa a Rueda de «normalizar» a Vox e de tenderlle a «alfombra vermella»

• Rueda reivindica a súa maioría absoluta tras o tropezón de Moreno Bonilla e ve «nefasto» o resultado do PSOE
• Rueda «intentará» acudir á manifestación do PP contra Pedro Sánchez en Madrid.

Lara Méndez, secretaria de organización do PSdeG, acusou Alfonso Rueda de tenderlle “alfombra vermella” á ultradereita mentres “media Europa ergue un cordón sanitario”. “Cada vez está máis claro que PP e Vox son o mesmo. Non o dicimos nós, confírmao el cada vez que fala”.

Así se pronunciou, a través dun comunicado, sobre as declaracións de Rueda nunha entrevista con Europa Press, nas que considerou que, se o líder do PP, Alberto Núñez Feijóo, non consegue suficientes apoios nas eleccións xerais para gobernar “en solitario”, está “obrigado a conformar maiorías”, no que se mostrou consciente de que Vox estará na ecuación. “O lóxico”, esgrimiu, é que “busque esas maiorías e que se normalicen se son necesarias”.

Un día despois, estas declaracións atopáronse coas críticas da dirixente socialista, que cre que, para Rueda, “pactar coa ultradereita é o lóxico”. “É dicir, que sentar nos gobernos a quen nega a violencia machista e o cambio climático, por exemplo, é o lóxico”, afeou.

Lara Méndez apuntou que o propio Rueda “admite que non lle gustan moitos dos postulados de Vox” e, aínda así, “pide normalizalos”. “Recoñece o que son e pídelles paso”, reprochou. Deste xeito, a responsable de Organización do PSdeG encargoulle ao líder do PPdeG que lle diga á cidadanía galega que, “cando lle fagan falta os votos da ultradereita, fará exactamente o que hoxe lle recomenda a Feijóo”.

“A porta que abre en Madrid dá directamente a San Caetano. Vox non ten hoxe deputados no Parlamento galego e o labor dun presidente sería que seguise sen telo, non prepararlle o terreo”, criticou Méndez, que asegurou que o PSdeG “non” está disposto a “normalizar á ultradereita”.