Actualizado
Comentarios
Touriño e Laxe, entre os 350 asinantes do manifesto que cuestiona a xestión do ‘caso Tomé’
O documento, impulsado por mulleres socialistas en respaldo á dimisión de Silvia Fraga como secretaria de Igualdade, sinala que causa "estupor, vergoña e unha inevitable desafección co partido" as denuncias de acoso sexual presentadas no canal interno.
Arquivo – O expresidente da Xunta de Galicia Fernando González Laxe (e) e o expresidente da Xunta de Galicia Emilio Pérez Touriño (d), nunha imaxe de arquivo – Álvaro Ballesteros – Europa Press – Arquivo
Comentarios
Os expresidentes da Xunta Emilio Pérez Touriño e Fernando González Laxe figuran entre os case 350 asinantes do manifesto impulsado por mulleres socialistas en respaldo á dimisión de Silvia Fraga como secretaria de Igualdade do partido en Galicia, a raíz da xestión da actual dirección fronte ás acusacións por suposto acoso sexual contra o xa expresidente da Deputación de Lugo e alcalde de Monforte, José Tomé.
Do total de asinantes, un centenar de nomes corresponden con homes entre os que tamén está o que exalcalde da Coruña e exdelegado do Goberno, actualmente membro do Consello de Estado, Javier Losada, o que foi voceiro parlamentario do partido Xoaquín Fernández e outros históricos socialistas como Ricardo Varela e Francisco Cerviño.
Na xornada do domingo transcendeu este manifesto impulsado por un total de sete alcaldesas do PSdeG, coa da Coruña, Inés Rey, á cabeza, así como máis de 60 mulleres da esfera socialista en respaldo á dimisión de Silvia Fraga.
“A súa dimisión é un acto de compromiso feminista co que nos sentimos profundamente representadas”, aseguran no ‘Manifesto aberto polo feminismo no PSdeG-PSOE’, que xa secundan máis de 230 mulleres.
Entre elas, están a alcaldesa de Betanzos, María Barral; a rexidora de Maceda, Uxía Oviedo; a de Meis, Marta Guiráldez; a de Guitirz; Marisol Morandeira; a de Silleda, Paula Fernández; a de A Pobra de Trives, Patricia Domínguez, así como a de Rairiz de Veiga, Asunción Morgade.
Ademais, figura a concelleira de Igualdade do Concello de Vigo, Ana Laura Iglesias; así como as edís de Lugo Olga López Racamonde e Ángeles Novo, xunto con María Reigosa.
Tamén figuran históricas socialista como Carmen Morón, exdeputada que presidiu a comisión do Congreso na que se tramitou a Lei contra a violencia de xénero durante o Goberno presidido por José Luis Rodríguez Zapatero; Marisol Soneira, Margarita Pérez Herráiz e Carmen Cajide.
“Estupor, vergoña e unha inevitable desafección co partido”
O texto sinala que causa “estupor, vergoña e unha inevitable desafección co partido” as denuncias de acoso sexual presentadas no canal interno do PSOE “contra cargos institucionais e orgánicos socialistas”, aínda que non se refire en particular a ningún dos varios casos que se foron coñecendo ultimamente.
As asinantes avalan que non poden quedar “impasibles” ante a dimisión de Silvia Fraga tras un traballo que ven “exemplar” e defenden a súa traxectoria fronte a “informacións ou interpretacións que se pretenden deslizar e que non se corresponden coa verdade”.
“Dende a lealdade ao partido e aos seus principios, por suposto defendemos a necesidade de aclarar os feitos, protexer ás vítimas e preservar a integridade das institucións. Só unha actuación firme e coherente permitirá manter a confianza da cidadanía e demostrar que non hai espazo para a impunidade nin para ningunha forma de violencia contra as mulleres”, proclaman.
Máis nomes que se suman ao manifesto
“Non ten cabida ningunha actuación que ampare ou relativice o acoso sexual e o machismo”, proclama o manifesto que tamén subscriben as portavoces socialistas nos concellos de Castrelo de Miño, Catalina González Álvarez, e Zas, Sheila Rial Mata; as tenentes de alcalde do Concello de Tui, Ana María Núñez Álvarez, e o de Vilamartín de Valdeorras, Sherezade Núñez Rodríguez; e as concelleiras Nereida Canosa Domínguez (A Coruña), Ángeles Novo Martínez (Lugo), Yoya Blanco Rial (Pontevedra), Isabel González Cancela (Ames), Marta María Iglesias Becerra (Culleredo), Silvia Baranda Fernández (O Carballiño), Lucía Picos Aneiros (Cedeira) e María Rosario Huertas Garabana (Pontedeume).
Figuran tamén os nomes da deputada provincial en Ourense Susana Rodríguez Estévez; e a xerente de Suelo Empresarial del Atlántico (SEA), Beatriz Sestayo Doce.
Tamén están excargos como as exsubdelegadas do Goberno na Coruña María Rivas López e Pilar López Riobóo; a exsecretaria de Estado de Igualdade no goberno de José Luis Rodríguez Zapatero, Laura Seara; a exdelegada do Goberno en Pontevedra Maica Larriba Garcia; ou a exdelegada provincial da Consellería de Traballo e Asuntos Sociais María Debén Alfonso.
Exdeputadas como Patricia Vilán Lorenzo e Rosa Gómez Limia; exalcaldesas como Elvira Lama Fernández (Xinzo de Limia), e a exsecretaria xeral de Xuventudes Socialistas de Galicia María Torres Pose, tamén subscriben o manifesto.
Este manifesto ve a luz dous días despois de que xa o pasado venres varios alcaldes e outros cargos socialistas na provincia de Ourense lanzasen un comunicado no que aseguraban que “quen oculta, ampara, relativiza ou ralentiza as investigacións convértese en cómplice e, como tal, tamén debe asumir as súas responsabilidades e deixar todos os cargos”.
