Ana Pontón esixe explicacións ao PSOE polo ‘caso Tomé’: «Non se actuou con rapidez»
A voceira nacional do BNG critica que o PP pida agora responsabilidades "cando este mesmo ano encubriu durante meses a un presunto agresor sexual"
A voceira nacional do BNG, Ana Pontón, no inicio da manifestación contra Altri, a 14 de decembro de 2025. – CÉSAR ARXINA – EUROPA PRESS
Comentarios
Ana Pontón, voceira nacional do BNG, fixo este domingo un chamamento aos dirixentes do PSdeG para dar “explicacións” e “asumir responsabilidades” sobre as informacións trascendidas sobre supostos casos de acoso sexual que implican a José Tomé, que, ata agora, era o presidente da Deputación de Lugo.
Preguntada polo caso en declaracións aos medios, a líder nacionalista, que apuntou que “non se actuou con rapidez”, expresou a súa tristeza polo sucedido e chamou a acompañar ás vítimas “afecte a quen afecte”.
Á súa vez, mostrou a súa sorpresa polo que o caso do exconselleiro acusado de agresión sexual, Alfonso Villares, “non tivese a mesma repercusión”. “O PP agora esixe responsabilidades cando este mesmo ano encubriu durante meses a un presunto agresor sexual”, criticou Pontón, que censurou de novo que fose “despedido” entre aplausos.
Manifestación contra Altri
Dende Santiago, antes do inicio da manifestación contra Altri, reiterou a súa “solidariedade e apoio” ás mulleres denunciantes, que “seguramente” se enfronten a un “proceso moi complexo para elas”. “Se facer unha denuncia por acoso sexual é sempre algo moi complexo, cando isto toma dimensión pública a situación é moito máis delicada”, expresou.
En relación a se o BNG retirará o seu apoio ao goberno da Deputación –do que forma parte–, Pontón reafirmou que se vai “a ver como acaba esta situación”: “Onde seguimos neste momento é que Tomé dimita de todas as súas responsabilidades”.
