O BNG pide «medidas de rexeneración democrática» ao PSOE e aparca a moción de censura
O deputado do BNG no Congreso, Néstor Rego, reclama a Pedro Sánchez que poña en marcha medidas "efectivas" contra a corrupción para que lle dean "algún tipo de lexitimidade para falar".
Néstor Rego durante unha comparecencia en Madrid / BNG
Comentarios
O Bloque Nacionalista Galego move ficha tras a sentenza de 24 anos de cárcere para o exministro de Transportes e exsecretario xeral do PSOE, José Luis Ábalos. O deputado do BNG no Congreso, Néstor Rego, afeou este martes ao presidente Pedro Sánchez que o seu Goberno non aprobase aínda “nin unha soa medida” de rexeneración democrática e cre que resolver esa débeda é a forma axeitada de asumir as súas responsabilidades políticas pola sentenza do caso máscaras.
Rego reivindicou a necesidade de ser “implacable” e “contundente” coa corrupción, “veña de onde veña”, e asumir as responsabilidades políticas tras o denominado Caso Máscaras. Segundo Rego, non basta con que o PSOE insista en que xa apartou do partido aos responsables da corrupción, senón que “debe adoptar medidas de rexeneración democrática para evitar que situacións deste tipo se volvan a producir”.
Nesta liña, o deputado galego criticou que, despois dos “famosos” cinco días de reflexión que se tomou Sánchez hai uns meses, o seu Executivo non aprobase “nin unha soa medida” das que anunciou entón, cando pediu ás forzas parlamentarias propostas para reforzar o combate á corrupción. É por iso que volveu reclamar “unha vez máis” a Sánchez que poña en marcha medidas “efectivas” neste sentido porque “isto é o que pode dar algún tipo de lexitimidade para falar con esta situación”.
Máis inversións en Galicia
En paralelo, Rego censurou a suspensión da condena a 4 anos e medio de prisión ao empresario Víctor de Aldama por parte do Tribunal Supremo, o que, ao seu modo de ver, pon en evidencia que a Xustiza “actúa en función de intereses políticos máis que de decisións estritamente xudiciais”. E é que Rego ve “sorprendente” que “nunca haxa consecuencias” para os empresarios corruptores.
O deputado do Bloque quixo deixar claro que o seu partido non vai favorecer “nin por activa nin por pasiva” un Goberno de dereitas. Agora ben, esixiu ao actual que “cumpran estritamente” os compromisos asinados cos nacionalistas galegos. “Hai medidas que están en marcha e outras pendentes que deben ser executadas canto antes”, dixo Rego, entre as que destacou a necesidade de poñer en marcha un servizo de cercanías en Galicia e ver reflectidas nos próximos Orzamentos as inversións que require esta comunidade.
