Rueda critica ao BNG por «mirar para outro lado» co ‘caso Tomé’: «Ten que actuar con contundencia»

O presidente da Xunta lamenta o “espectáculo” que está dando a provincia de Lugo esta semana, despois de coñecerse a denuncia por suposto acoso sexual contra José Tomé, ata entón presidente da Deputación, e critica ao BNG por “mirar para outro lado cando ten que actuar con contundencia”.

Así o apuntou este domingo durante unha reunión de traballo cos alcaldes máis novos do partido celebrada este domingo, o mandatario autonómico lamentou a “loucura na que se converteu España” co goberno socialista “dando un escándalo cada día e ocupados en todo menos en gobernar”.

Alfonso Rueda enfatizou que os socialistas están “ocupados en tapar o escándalo do día anterior co escándalo do día seguinte”. Por iso, afirma que se “alegra moitísimo” de que a xente poida percibir as diferentes maneiras de facer política.

“Complicidade absoluta” do BNG

Así, referiuse ao “espectáculo” que está dando a provincia de Lugo esta semana, e á “complicidade absoluta” do BNG, que “goberna con todos eles e que mira para outro lado cando ten que reaccionar con contundencia”.

“Eu alegrome moitísimo de que nós estemos a outra cousa. Ese ‘sentidiño’, esa preocupación polos asuntos das persoas que nos dan a súa confianza. A política non son escándalos, a política non é mirar para outro lado cando hai que actuar con contundencia, a política non é preocuparse sempre de crear tensión como ferramenta para conseguir fins políticos”, reivindicou.

Na súa intervención, o presidente da Xunta agradeceu aos 15 alcaldes menores de 40 anos que asistiron á xornada, subliñando que “representan a maneira que ten o PP de chegar a toda a sociedade ocupándose dos seus problemas e das cousas que de verdade importan”.

“A política é o día a día de traballo, desde os Concellos e eu alegrome de que teñamos tanta xente nova, que é un exemplo de todo iso”, concluíu.