Javier Guerra, exconselleiro de Economía: «Galicia ten suficiente forza e tradición para ter máis empresas téxtiles»

Javier Guerra, presidente do Clúster do Sector Téxtil-Moda de Galicia (Cointega), destacou a necesidade de “reposicionar” o sector e que Galicia “sexase foco do sector en España”. O que fora conselleiro de Economía entre 2009 e 2011, no primeiro Goberno de Alberto Núñez Feijóo, destacou que a comunidade “ten suficiente forza, coñecemento de anos, tradición e nome para ter máis empresas”. 

Guerra participou este venres nun almorzo informativo celebrado este venres na sede da Confederación de Empresarios de Ourense (CEO), xunto ao vicepresidente do Clúster, Carlos López, e a xerente, Rosa Pino, no que presentaron a nova folla de ruta de Cointega que contempla a aplicación de sete novos eixes para “orientar a evolución do sector nos próximos anos”. 

O Clúster recalca que o sector atravesa actualmente “a transformación máis profunda da súa historia recente”, destacando entre os principais retos, unha dixitalización “acelerada”, a entrada en vigor do Pasaporte Dixital do Produto, así como “novas esixencias europeas en sustentabilidade e trazabilidade” ou a “presión por relocalizar a produción” e a “irrupción” da intelixencia artificial; todos eles, factores que “están a redefinir as regras do xogo”.

“A folla de ruta de Cointega busca fortalecer toda a cadea de valor na comunidade, impulsar a innovación e consolidar o téxtil galego como referencia europea en moda responsable, tecnoloxía aplicada e produción de alto valor engadido”, engadiu Guerra.

Os plans de Cointega

Entre os novos eixes marcados, indicaron un novo Plan de Comunicación encamiñado a “reforzar a visibilidade do téxtil galego”, así como a súa capacidade de innovación “a nivel nacional e internacional”, destacando a presentación do congreso “Fíos do Futuro”, que se celebrará a finais de 2026.

Así mesmo, o Clúster incidiu na creación dun Mapa de Capacidades Industriais do Téxtil en Galicia, co obxectivo de “identificar e sistematizar o ecosistema produtivo, tecnolóxico e creativo galegos”, así como a organización de xornadas sectoriais para fomentar a cooperación e colaboración.

Nesta liña, destacaron, ademais, a transformación dixital e a aplicación da intelixencia artificial ao sector para “revalorizar” o emprendemento no téxtil e moda galegas e “que se teñan en conta todas as empresas que forman a cadea de valor”.

Seguidamente, presentaron unha nova proposta de Plan Director do sector a medio e longo prazo, para “ordenalo, fortalecelo e proxectalo internacionalmente”, así como a creación dun Business Factory Téxtil como unha “futura iniciativa de incubación e aceleración” de proxectos baseados en novos retos, anunciando ademais un evento anual de posicionamento que se celebrará “en próximas datas”.