A Xunta presiona ao TSXG para "desbloquear" os 70 parques eólicos paralizados

A Xunta de Galicia move ficha tras a sentenza do Tribunal de Xustiza da Unión Europea (TXUE) que avala a súa tramitación de novos proxectos eólicos. A conselleira de Medio Ambiente e Cambio Climático, Ángeles Vázquez, trasladou este mércores que non ten “ningunha dúbida de que o Tribunal Superior de Xustiza de Galicia (TSXG) vaia poñerse a traballar para desbloquear os 70 parques eólicos parados”.

Ao seu xuizo, coa sentenza europea “gaña Galicia” e, ademais, defende que “non tería sentido” que o TSXG non desbloqueara os proxectos “porque conta con toda a seguridade xurídica para facelo”.

Neste sentido, a conselleira sinalou que co tempo que pasou “varios deses proxectos seguramente terán que ser modificados“, porque “a enxeñería é moi cambiante e pasados cinco ou seis anos a tecnoloxía avanza”. Isto supón o “dobre de traballo” para as empresas detrás dos parques e a propia administración, pero, a titular de Medio Ambiente destacou que a Xunta “está afeita a que lles marquen sempre retos”.

Críticas á oposición

En paralelo, Vázquez reprochou á oposición que menosprezase o traballo dos técnicos. “Unha parte é política e outra parte é o traballo rigoroso que fan os técnicos, que son os técnicos de todos, incluída a oposición, porque en realidade vixían polo cumprimento estrito da lei”, subliñou.

Por iso, sentenciou que “aquí non se trata de gañar ou de perder. Aquí gañou Galicia porque fai as cousas ben”, e pediulle á oposición que “se van coller algo de vacacións, reflexionen sobre a imaxe que queren dar da Comunidade no exterior”.

Con todo, finalizou enfatizando que o Goberno galego pretende “ter enerxía limpa, enerxía verde, seguir descarbonizando Galicia e ter luz máis barata para os cidadáns”.