Europa avala a tramitación eólica da Xunta e despexa o camiño de 92 parques

O Tribunal de Xustiza da Unión Europea (TXUE) amendou ao Tribunal Superior de Xustiza de Galicia (TSXG). O organismo europeo emitiu unha sentenza na que responde á cuestión prexudicial lanzada polas instancias xudiciais galegas a través da cal querían coñecer o criterio sobre a exposición pública de proxectos de novos parques eólicos antes de dispoñer de todos os informes sectoriais das administracións implicadas.

Neste sentido, o TXUE recalca que a normativa comunitaria “non se opón” á normativa dun estado membro «segundo a cal no marco dun procedemento de avaliación de impacto ambiental dun proxecto suxeito a dita directiva as autoridades que poidan estar interesadas nese proxecto debido ás súas responsabilidades ambientais específicas ou ás súas competencias locais ou rexionais, son consultadas ao mesmo tempo que o público interesado».

«Sen que ese último -engade- teña dereito a formular posteriormente ante a autoridade ou autoridades competentes para autorizar o referido proxecto as súas observacións e opinións sobre os ditames emitidos nese contexto polas autoridades consultadas», destaca o tribunal europeo.

O TXUE pronúnciase de maneira similar a como o fixera previamente o Tribunal Supremo e facilita o proceso de tramitación de 92 parques eólicos que se atopaban actualmente bloqueados.

«Celebramos que o TXUE se pronunciara dunha forma tan contundente e taxativa, que lle dá a razón á Xunta en canto á súa forma de tramitar os proxectos eólicos», defendeu a Asociación Eólica de Galicia (EGA).

A patronal do sector en Galicia confía en que este fallo «permita poñer fin a cinco anos convertidos nun deserto industrial en materia de enerxías renovables». «Que este fito xudicial supoña un antes e un despois na reactivación e desenvolvemento do sector en Galicia», defende a entidade.