Os sindicatos celebran o «paro total» co transporte de viaxeiros na Coruña.

Nova xornada de paros no sector do transporte de viaxeiros por estrada na provincia da Coruña. Os sindicatos falan de “paro total” tras esta folga que se produciu nun contexto “sen contacto” coa patronal, tal e como denunciou o representante de CIG-Transportes, Ernesto Rei, en declaracións a Europa Press.

O representante sindical culpou á patronal da falta de diálogo e asegurou que sen esa aproximación non é posible a mediación a través do Consello Galego de Relacións Laborais. Ademais, Rei lamentou a actitude da Xunta que, ao seu xuízo, se puxo de “perfil” no conflito.

Segundo o representante da CIG, debe ser a Dirección Xeral de Mobilidade a que requira á patronal para sentarse a negociar ante unha nova xornada, dixo, de “paro total”. “Se non se fala radicalizarase máis o conflito do que está”, indicou en relación ás novas xornadas de folga convocadas para os días 19, 20 e 23 de xaneiro, con anuncio de paro indefinido a partir do 2 de febreiro se non hai negociación.

Segundo a axencia Europa Press, este venres houbo nas estacións de autobuses piquetes, pero con ausencia de incidentes. Aínda que aludiron á saída de rutas escolares, remarcaron que a maioría dos autobuses non realizaron as saídas habituais.

Os paros foron convocados polos sindicatos CCOO, UGT e CIG e seguen o camiño das mobilizacións que tiveron lugar en decembro. Os sindicatos denuncian o “inmobilismo” da patronal de cara á negociación do citado convenio, no que esta parte demanda melloras salariais e laborais, e advertiron que se non hai aproximación das posturas os traballadores e traballadoras están convocados a folga indefinida a partir do 2 de febreiro.

Neste sentido, insisten en que o principal motivo é a existencia dun convenio “desfasado” e “paralizado” desde hai catro anos.