A Xunta inicia a tramitación da medida clave para blindar a balsa de lodos de Alcoa
O Diario Oficial de Galicia publica este venres o proxecto construtivo, o plan de restauración e o estudo de impacto ambiental do recrecemento do depósito de lodos vermellos de Alcoa en Xove co obxectivo de elevalo ata os 110 metros.
Vista aérea da balsa de lodos da factoría de Alcoa en San Cibrao, Cervo (Lugo).
Comentarios
A Xunta pon en marcha os trámites para o recrecemento do depósito de lodos vermellos de Alcoa á cota 110 (110 metros). O Diario Oficial de Galicia (DOG) publica este venres o proxecto construtivo, o plan de restauración e o estudo de impacto ambiental, que se someten a información pública durante 30 días.
O DOG recolle así o acordo polo que o proxecto, o plan e o estudo promovidos por Alúmina Española se someten a información pública para abordar esta medida clave en Xove.
“É fundamental que se continúen con todos os trámites administrativos correspondentes á cota 110, necesitamos que isto se valide canto antes”, destaca ao respecto, en declaracións a Europa Press, o presidente do comité de empresa de Alcoa na Mariña, José Antonio Zan.
Neste sentido, o representante dos traballadores subliña que “sobre todo” o que precisa a factoría é que a empresa “sexan máis diligentes aínda se pode ser” e dispoña “canto antes dos fondos para facer a inversión”. “Porque a cota 110 ou se aproba este ano ou imos vernos cun problema gravísimo e todo por responsabilidade única e exclusiva de Alcoa“, avisa Zan.
Os documentos poderán consultarse durante este período no servizo de Enerxía e Minas do departamento territorial da Consellería de Economía e Industria de Lugo, e no portal web da devandita consellería. As posibles alegacións presentarase durante o prazo sinalado, dirixidas ao director territorial.
