Alcoa: “Estamos satisfeitos coa nosa carteira, deixando á marxe España, onde buscamos solución a longo prazo”
A vicepresidenta indica nunha conferencia para Citigroup que, tras anos de axustes, o grupo seguirá investindo nos seus actuais activos, aínda que non aclara o futuro de San Cibrao.
Planta de alúmina de Alcoa, en San Cibrao. Europa Press / Janet González
Comentarios
Segue a incerteza co futuro do complexo de Alcoa en San Cibrao, na Mariña lucense. Esta semana, no marco dunha conferencia organizada por Citigroup, a súa vicepresidenta, Molly Beerman, indicou que o grupo está “moi satisfeito” coa carteira de activos coa que conta neste momento, tras anos de axustes, aínda que “deixando de lado por un momento España ”, onde aínda ten problemas e busca unha “solución a longo prazo”.
Esa indefinición respecto ao futuro dos únicos activos que lle restan ao grupo no Estado está directamente relacionada co anuncio realizado o pasado outubro, cando o grupo con sede en Pittsburgh evidenciou nun evento ante investidores e analistas que ten dúas follas de ruta moi distintas que se definirán a partir de 2027: unha pasa por continuar coas operacións e outra abre a porta a vender a planta de aluminio primario, agora en plena fase de rearranque, e pechar a refinería de alúmina.
Pouco máis dun ano para decidirse
A elección da data de 2027 ten un sentido. É cando a multinacional considera que a produción de aluminio volverá ser viable e cando, no caso de iniciar unha desinversión, atoparíase máis libre, xa que é o período no que vence o acordo de viabilidade pactado cos traballadores e polo que se comprometeu a non iniciar ningún tipo de medida de redución laboral.
Na conferencia organizada por Citigroup, a número dous de Alcoa foi preguntada sobre se, tras anos de redución e peches de activos, a empresa estaba satisfeita coa súa carteira actual ou se deberían esperar novos axustes. A executiva respondeu que todo parece estar ben de momento, a excepción de España.
“Realizamos un traballo de carteira considerable nos últimos anos, e anunciamos no Día do Investidor que cremos que estamos chegando ao seu fin”, respondeu. “Estamos moi satisfeitos coa carteira que temos actualmente, deixando de lado por un momento España, xa que estamos aínda loitando coa situación alí e buscando unha solución a longo prazo”, expuxo. “Con todo, estamos comprometidos cos activos que xestionamos actualmente e cremos que seguiremos investindo neles e impulsando este grupo de activos”, resolveu.
Alúmina
O futuro do histórico complexo industrial de San Cibrao non está marcado aínda. Na súa anterior conferencia ante analistas, Beerman apuntou a un feito: a compañía terá que acometer unha importante inversión relacionada co almacenamento de residuos na refinería de Alúmina tome finalmente a decisión de pechar ou non. “A inversión na área de almacenamento de residuos está incluída no plan de investimentos. Representa aproximadamente 50 millóns de dólares anuais durante 2025, 2026 e 2027. A inversión é necesaria, independentemente de se a refinería continúa operando ou se pecha”, informou.
Todo parece depender, en gran medida, do mercado e dos prezos. “Se os prezos da alúmina son favorables, poderiamos aumentar a produción na refinería a finais de 2026, unha vez finalizada a primeira fase das obras de investimento. En xeral, a situación financeira da planta seguirá sendo complicada en 2026. Con todo, despois de 2027, esperamos ter maior flexibilidade”, dixo.
As oportunidades do aluminio
Á marxe do activo galego, a executiva realizou unha valoración do sector do aluminio, indicando que aínda que mellorou a súa posición tanto en Europa como en América fronte á forte competencia asiática “a nivel rexional, China segue importando alúmina e o déficit persiste en Norteamérica e en Europa, onde centramos o noso negocio”. “A longo prazo, observamos un gran crecemento na alúmina. As perspectivas seguen sendo moi positivas nos mercados clave, principalmente no transporte, non só para vehículos eléctricos, senón tamén para a redución de peso e a combustión. Polo tanto, o crecemento do sector automotriz continúa” apuntou.
A tamén responsable financeira do grupo destacou o potencial do aluminio como produto clave na construción de centros de datos. Ademais, indicou que “o sector dos embalaxes experimentou un gran auxe. Os consumidores prefieren opcións reciclables e sostibles. Por iso, o aluminio está prosperando neste sector”. Do mesmo xeito, tamén apuntou ao percorrido do material en “a modernización da rede eléctrica e o desenvolvemento de enerxías renovables”. “O aluminio úsase en paneis solares, turbinas eólicas e liñas de transmisión. As súas perspectivas son boas a longo prazo”, conviño.
