Atalaia capta máis de 145 millóns no mercado para apuntalar o seu proxecto en Touro e Riotinto.

Atalaya Mining suma e segue. A compañía que capitanea o galego Alberto Lavandeira completou con éxito unha ampliación de capital por valor de 127 millóns de libras (uns 146 millóns de euros ao cambio actual) tras selar a emisión dun total de 12,73 millóns de novas accións a un prezo de 10 libras cada unha.

A firma que opera a mina de cobre de Tiotinto (Huelva) e que tramita a reapertura do xacemento de Touro, celebra que “tanto a colocación como a oferta minorista foron sobresuscritas e recibiron un forte apoio dos investidores existentes e novos”. “Isto representa un fito importante para Atalaya e permitiranos acelerar os nosos proxectos de crecemento en España, ao mesmo tempo que fortalecemos o noso balance e melloramos a nosa flexibilidade financeira para o desenvolvemento de Touro“, destacou Alberto Lavandeira.

O CEO de Atalaya Mining subliña que o “peche exitoso desta rolda reflicte a confianza dos nosos investidores na nosa estratexia, o noso equipo e o valor a longo prazo da nosa carteira. Queremos expresar o noso sincero agradecemento aos accionistas, tanto novos como existentes, polo seu continuo apoio á medida que avanzamos nos nosos proxectos no distrito de Riotinto e posicionamos a Atalaya para capitalizar os fundamentos positivos do mercado do cobre”.

A través dun comunicado remitido á Bolsa de Londres, Atalaya Mining subliña que estes fondos empregaránse para acelerar “o desenvolvemento dos seus proxectos de crecemento co cobre en España” ante os “fortes fundamentais” que presenta o mercado desta materia prima. Ademais, a firma destaca que estes 146 millóns de euros adicionais lle dotan de “flexibilidade financeira para optimizar” as súas operacións en Riotinto e Touro.

Atalaya Mining desátase en bolsa

Atalaya Mining pechou este movemento nun momento marcado pola súa escalada en bolsa. As accións da compañía triplicaron o seu valor nos últimos 12 meses e xa cotizan no entorno das 10,46 libras. Este acelerón provocou que a súa capitalización bursátil se estirase ata os 1.690 millóns de euros, deixando como principais beneficiados a Trafigura e Cobas Asset Management.

A primeira, un xigante mundial das materias primas, controlaba ata agora un 21,6% do capital de Atalaya Mining a través da súa sociedade Farringford NV. A xestora de fondos de Francisco García Paramés, pola súa banda, erixíase como segundo máximo accionista grazas á súa participación do 9,9% (vendeu case un 5% a finais do ano pasado). Pola súa parte, a francesa Ithaki, controla un 8,35%, porcentaxe que se reduce ata o 5,8% no caso de Hamblin Watsa Investment Counsel, o 4,9% en Polar Capital LLP e o 3% en Muza Xestión de Activos.