Juan Carlos Escotet e Fernández Somoza, as fortunas de Galicia que máis medran
Forbes eleva o patrimonio do dono de Abanca ata os 6.200 millóns, 2.200 millóns máis que no ranking do ano pasado; e o do expropietario de Azkar ata os 800 millóns, case o dobre que en 2024.
Juan Carlos Escotet, presidente de Abanca
Comentarios
A lista das grandes fortunas de España segue tendo unha importante parada en Galicia. Non só por Amancio Ortega e a súa familia, que encabezan o ranking de Forbes grazas ás accións de Inditex, que supera os 145.000 millóns de capitalización no IBEX. Xunto a Amancio, Sandra e Dolores Ortega, ademais da súa nai, Primitiva Renedo, hai outros tres grandes patrimonios que se colan entre os 100 máis voluminosos do Estado e que teñen raíces en solo galego.
O máis relevante é o de Juan Carlos Escotet, presidente e principal accionista de Abanca, que está considerado pola revista como a quinta persoa máis rica de España, cunha fortuna de 6.200 millóns. O banqueiro venezolano é, ademais, o que máis engordou o seu patrimonio desde a publicación do último ranking de Forbes, pois elevouse nun ano en 2.200 millóns. Supera a Juan Roig, o dono de Mercadona, que incrementou a súa tesourería en 2.100 millóns.
Esta evolución contrasta coa da familia Ortega, que seguiu o camiño contrario. O fundador de Inditex perdeu 10.300 millóns de patrimonio no mesmo período; a súa primoxénita, Sandra Ortega, 400 millóns; a súa sobriña, Dolores Ortega, retrocedeu 100 millóns; os mesmos que a súa cuñada, Primitiva Renedo.
Aínda así, todos eles ocupan postos de privilexio no ranking. Amancio Ortega é, como sempre, o español máis rico, cunha fortuna de 109.900 millóns, segundo os cálculos da publicación; Sandra Ortega é a segunda maior fortuna, con 10.000 millóns; Dolores Ortega está no posto 56, con 850 millóns; e a súa nai no 63, con 800 millóns.
Subidón dos Fernández Somoza
Os antigos donos de Azkar, a familia Fernández Somoza, conseguiu elevar significativamente o seu patrimonio nun ano, alcanzando os 800 millóns, 375 millóns máis que no ranking de 2024, case o dobre. O holding familiar é Carteson, aínda que o seu diñeiro tamén se canalizaba a través de dúas sicavs, Currelos e Guntín, que ao longo deste ano deron de baixa.
O patrimonio procede da fortuna que fixo Luis Fernández Somoza no sector do transporte, unha actividade que segue vinculada á familia a través de Transportes Auto Radio. De feito, recentemente venderon á suíza Kuehne+Nagel a súa outra empresa do sector, TDN, por 60 millóns.
