Pablo Isla escala posicións no ‘top 10’ de líderes empresariais de Merco, xunto a Marta e Amancio Ortega
O ranking, que recoñece ás mellores empresas e líderes de 2026, destaca como grupo con mellor reputación a Inditex, e sitúa a Nestlé no número 13 da lista, inmediatamente por riba de Corporación Hijos de Rivera, que repite no 14.
Pablo Isla, de costas, nunha imaxe de arquivo xunto con Carlos Torretta (esq), Marta Ortega e Amancio Ortega, no concurso hípico de Casas Novas. Foto: Cabalar/EFE
Comentarios
Merco acaba de presentar os resultados da súa nova edición de mellores empresas e líderes, onde se recoñecen as 200 compañías e os 100 executivos con mellor reputación de 2026. A nómina galega gaña peso nesta edición, con Inditex liderando o ránking de grupos empresariais e con Amancio Ortega e a súa filla Marta no posto número tres e catro dos mellores empresarios, por detrás de Juan Roig (Mercadona) e Ana Botín (Santander).
Esta edición, unha das maiores subidas a deu Nestlé, o conglomerado suízo que conta cunha decena de fábricas de produción en España. O seu presidente desde finais do ano pasado, Pablo Isla, que abandonou Inditex hai catro anos, escala posicións no top 10 dos mellores líderes empresariais, xa que pasa do posto 10 ao número 7, situándose entre Josu Jon Imaz (Repsol) e Isidre Fainé (La Caixa).
Se se atende á nómina de directivos galegos con mellor reputación, o CEO de Inditex, Óscar García Maceiras, queda ás portas do top ten ao quedar no posto número 11, ocupando na anterior edición o número 20, inmediatamente por riba de Florentino Pérez (ACS).
Ignacio Rivera, presidente e conselleiro delegado da Corporación Hijos de Rivera, os donos de Estrella Galicia, tamén se coloca no posto número 17 mentres que Juan Carlos Escotet, presidente de Abanca, escala do posto 69 ao 48. Adriana Domínguez, presidenta da téxtil ourensá Adolfo Domínguez, figura no 73, por riba de Carmen Lence, de Leite Río, que está no 95.
Ranking empresarial
O ranking de empresas con mellor reputación está liderado, como o ano anterior, por Inditex, que se coloca por diante de Mercadona, a ONCE e Repsol. A Nestlé de Pablo Isla sitúase no posto número 13, seguida de Corporación Hijos de Rivera, que tamén repite no 14.
Nesa lista de 200 empresas, tamén sobe posicións Abanca, do 89 ao 83. A cota galega complétase con Adolfo Domínguez (105), Gadisa (142), Grupo Lence, de Leite Río, no 173; Finsa, no 185; Ecoener, que figura por primeira vez e irrompe no 192 e Coren no 196.
Ambas listas de Merco foron elaboradas a partir dos resultados de 64.764 enquisas, sete avaliacións e 29 fontes de información. A metodoloxía a seguir foi obxecto dunha revisión independente de KPMG.
