Perdas millonarias, quebra técnica e rescate na terminal de contedores do Porto de Ferrol

Yilport acode ao rescate da terminal de contedores do Porto de Ferrol. O grupo turco que controla o 51% das accións de Ferrol Container Terminal inxectou outros 6,49 millóns de euros “co fin de cubrir as necesidades de tesouraría”, tal e como revela a propia firma na súa memoria anual do ano 2024.

Nela dá conta dunha caída do 37,2% na súa cifra de negocios, que retrocede desde os 2,1 millóns de euros obtidos en 2023 ata os 1,32 millóns dun 2024 á baixa “debido fundamentalmente ao panorama de desaceleración dos tráficos durante todo o ano”, recalca a firma. Ao seu xuízo, a inestabilidade internacional e “eventos xeopolíticos como a guerra en Ucraína e a situación orixinada no Mar Vermello e o Canal de Suez”, obrigou a “as compañías navieiras a reconfigurar as súas rutas, o cal favoreceu o crecemento de tráficos noutras terminales en detrimento da terminal de Ferrol“.

Esta caída do tráfico queda patente nos TEUS (unidade equivalente a un contedor de 20 pés). Estes retrocederon desde os 36.190 en 2022 ata os 24.913 en 2023 e os 13.896 en 2024. Isto traducíuse en novos números vermellos, que neste caso se elevaron un 9,6%, ata os 2,4 millóns de euros. A terminal de Cabo Prioriño acumula, deste xeito, unhas perdas por valor de 4,67 millóns de euros nos dous últimos anos, o que elevou o seu oco patrimonial ata os 14,77 millóns de euros.

“A sociedade leva acumulando varios exercicios sen conseguir acadar os niveis de actividade necesarios para comezar a equilibrar as súas contas”, destaca a firma, que apunta aos atrasos na conexión ferroviaria como un dos seus principais lastres. “Os atrasos na posta en funcionamento do acceso ferroviario á terminal. Outra importante incerteza que afecta ao desenvolvemento e futuro da sociedade, é a data en que a terminal conte con acceso ferroviario; dado que a finalización das obras de acceso ferroviario á terminal inicialmente previstas (2021), nestes momentos apuntan a finais de 2026 ou principios do 2027”, lamenta.

Inxección de Yilport a través de Leixoes

Con un patrimonio neto negativo de 14,77 millóns, a firma asegura que non se atopa “incursa na causa de disolución establecida no artigo 363 apartado e) da Lei de Sociedades de Capital”. A razón atópase en que parte do seu pasivo (15,14 millóns de euros) corresponde a préstamos participativos, mentres que outra parte do pasivo (17,28 millóns) “está conformado por préstamos ordinarios cuxa titularidade corresponde ao socio maioritario, outras empresas do grupo e socio minoritario”.

Neste sentido, os administradores “manifestan que non teñen coñecemento de que esta financiación non vaia continuar no futuro, pois a prioridade do socio maioritario é que a sociedade atenda as súas obrigas nos seus respectivos prazos en aras da viabilidade do proxecto, e iso con independencia de quen sexan os titulares das débedas”, recolle a memoria anual.

“Os administradores manteñen que o socio TCL-Terminal de Contenedores de Leixoes SA [tamén controlada por Yilport] está cumprindo coas previsións contidas no plan de negocio presentado a Xesgalicia“. O brazo inversor da Xunta de Galicia concedeu fai case 13 anos un préstamo de 6,4 millóns de euros a través do seu fondo Emprende FCR, que en 2023 foi transmitido á súa sociedade de capital risco, Sodiga.

“O socio TCL-Terminal de Contenedores de Leixoes SA está obrigado (salvo que o fondo autorice outra cousa) a permanecer como accionista da sociedade, con polo menos o 51% do seu capital social, mentres Sodiga Galicia ostente calquera crédito na mesma”, recolle a firma nas súas contas anuais.

Ampliación da concesión

Ferrol Container Terminal, que tamén presenta un fondo de manobra negativo por valor de 2,9 millóns de euros, ten entre as súas principais operadoras a navieiras como Pérez Torres, Grupo Nogar ou CMA-CGM, coa madeira (taboleiro, bloques de madeira, etcétera), lousa, carga refrixerada (peixe, polbo), e a cervexa a granel como as súas principais cargas. A inversión en inmobilizado ronda os 17 millóns de euros.

A terminal recibiu un impulso o pasado mes de decembro despois de que o consello de administración da Autoridade Portuaria de Ferrol-San Cibrao aprobase unha modificación substancial da concesión a Ferrol Container Terminal para prorrogar a súa concesión 15 anos máis do previsto, ata setembro de 2063.

O ente subliñaba que con esta ampliación na concesión, “Yilport reafirma o seu compromiso coa mellora continua, a innovación tecnolóxica e a sustentabilidade operativa e reforza a súa aposta polo futuro da terminal. En definitiva, trátase de contribuír a consolidar a posición do porto como nodo loxístico competitivo e eficiente no Atlántico europeo”.

Ademais, a Autoridade Portuaria de Ferrol-San Cibrao recalca que a posta en servizo da conexión ferroviaria está prevista para o segundo semestre deste ano e que “a empresa comprométese a realizar unha serie de investimentos que consisten fundamentalmente en adquisicións de nova maquinaria e melloras sobre a actual por importe de preto de 25 millóns ata o 2041”. “Isto permitirá aumentar a capacidade operativa e a eficiencia global; manter os altos estándares de seguridade, fiabilidade e sustentabilidade, atraer novas liñas marítimas e fortalecer a conectividade do porto de Ferrol“, recalca, antes de anunciar a incorporación da consignataria Hamilton y Compañía SA (do grupo Transcoma) por un período de dez anos.