A maior pasteira portuguesa segue a Altri e expándese polo monte galego con 1.200 hectáreas de eucalipto

Navigator, a maior papeleira portuguesa, estende a súa actividade no monte galego. O grupo luso, que facturou 1.970 millóns o ano pasado, ampliou a superficie forestal que xestiona en Galicia ata as 1.488 hectáreas, o que supón un 34% máis que ao peche do exercicio de 2024. A antiga Portucel destina o 80,9% destes terreos á produción de eucalipto, que serve para abastecer as súas fábricas de Cacia, Setúbal, Figueira da Foz e Vila Velha de Ródão.

A compañía que dirixe António Redondo desde 2020 é un comprador tradicional de madeira en Galicia, ao igual que outras empresas do sector como Ence, o grupo con máis peso na comunidade, ou Altri. Nos últimos anos, ademais, incrementou a xestión propia de montes das 356 hectáreas que tiña en 2020 ás case 1.500 de 2025. Destas, máis de 1.200 están dedicadas ao eucalipto, segundo os datos que recolle na súa memoria anual, que fixo pública este luns.

A expansión de Navigator coincide coas limitacións á produción de eucalipto en Portugal e en Galicia, que vén de sufrir a peor vaga de incendios do século en canto a superficie calcinada o pasado verán, e de prorrogar ata 2030 a moratoria do eucalipto, aínda que admitindo algunhas medidas de flexibilidade que posibilitarán novas plantacións en casos concretos.

O avance da papeleira na xestión de montes galegos é tamén contemporánea á expansión de Altri, aínda que doutra forma. A compañía que dirixe José Soares de Pina creou o ano pasado a súa primeira estrutura empresarial no bosque de Galicia ao mercar a división forestal de Smarttia, a sociedade que controla Greenalia, asumindo tamén a carteira de provedores.

Como se abastece Navigator

O patrimonio forestal propio de Navigator sitúase en tres territorios: Portugal, Galicia e Mozambique. No mercado doméstico conta con 111.000 hectáreas, que inclúen zonas destinadas á preservación de valores naturais por estar incluídas en esquemas de protección (ZiC) e todas as parcelas xestionadas están certificadas polo sistema FSC. En Mozambique xestiona 27.000 hectáreas e en Galicia as mencionadas 1.488 hectáreas, unha parte moi pequena das súas plantacións propias. Estes montes cobren aproximadamente o 12% das súas necesidades de consumo de madeira.

Na rede de abastecemento da compañía tamén é Portugal o principal mercado para a obtención de madeira, aínda que tamén merca en Galicia e Andalucía, e en mercados non europeos, como Brasil e Uruguai. “A madeira ibérica é insuficiente para as nosas necesidades, polo que recorremos á importación de madeira de eucalipto de fóra de Europa, xenéricamente para consumos específicos similares á madeira adquirida en Portugal, a pesar de que con custos loxísticos elevados pola utilización do transporte marítimo de longas distancias”, di o grupo na súa memoria anual.

En Galicia o principal consumidor de eucalipto é Ence, para as súas plantas de Pontevedra e Navia, aínda que tamén mercan a propia Navigator, Altri ou DS Smith. As dificultades de Altri para consumar o seu gran proxecto de Palas de Rei, unha fábrica de pasta soluble e fibra téxtil que consumiría ata 1,2 millóns de metros cúbicos anuais, parece garantir a suficiencia do subministro aínda coas limitacións ás novas plantacións.

Caída de ingresos e beneficios

Navigator pechou o pasado exercicio cun volume de negocio de 1.970 millóns, un 6% menos, e uns beneficios de 145 millóns, o que supón unha caída do 50% respecto a 2024. A mala evolución destas magnitudes está estreitamente ligada aos baixos prezos que afrontou o sector durante todo o exercicio e que tamén perxudicaron os balances de Ence ou Altri. O ebitda situouse nos 376 millóns, cun retroceso do 31% e unha caída de sete puntos no marxe, que foi do 19%.

O grupo está diversificando a súa estrutura de ingresos mediante a área de packaging e o tissue, segmento para o que conta cunha planta en España, en Ejea de los Caballeros (Zaragoza). As grandes papeleiras ibéricas están acometendo procesos de diversificación, como mostra tamén a aposta de Ence polos proxectos renovables ou pola súa nova planta de As Pontes; ou de transformación, como mostra o novo enfoque de Altri cara a produción para a industria téxtil.

“A estratexia de diversificación que seguimos continúa xerando resultados sólidos, cos segmentos de tissue e packaging representando preto do 20% do volume de negocio e o 32% do ebitda, axudando a mitigar a presión sobre os resultados nun contexto de forte caída dos prezos de pasta de papel”, explica Navigator.