Rueda visita a fábrica de baterías de SAIC en China e dispara os rumores sobre o desembarco en Galicia
O presidente da Xunta reuniuse co presidente do grupo automobilístico e visitou instalacións clave xusto cando se dá por feito que a compañía ubicará unha fábrica de vehículos eléctricos en España.
O presidente da Xunta visita a fábrica de produción de baterías de SAIC, empresa que podería desembarcar en Galicia cunha planta de vehículos eléctricos. Foto: Xunta
Comentarios
A axenda do presidente da Xunta, Alfonso Rueda, na súa xira por China dispara os rumores sobre o posible desembarco da compañía automobilística SAIC, propietaria da marca MG, en Galicia. A firma quere construír unha factoría de vehículos eléctricos en España para poder sortear os elevados aranceis que lle impuxo a UE ao considerar que conta con altas axudas públicas no seu país que desequilibran os principios de competencia.
O xoves, acompañado da conselleira de Economía e Industria, María Jesús Lorenzana, Rueda mantivo un encontro co presidente de SAIC Motors, Xiaoqiu Wang, e outros cargos directivos da compañía e este sábado visitou, segundo informou a Xunta, a fábrica de baterías para vehículos do grupo situada en Zhengzhou.
Trátase dunha planta pioneira desta empresa participada polo Estado chinés. Conta cunha capacidade prevista de 300.000 packs de baterías ao ano e forma parte dun complexo industrial que representa a maior base de exportación do grupo.
“Capacidade loxística de Galicia”
Rueda insistiu nesta nova visita relacionada con SAIC nas “vantaxes competitivas de Galicia para atraer investimentos de alto valor engadido vinculados ás novas enerxías”. Tamén puxo en valor “a capacidade loxística e o ecosistema industrial galego para acoller proxectos que busquen a innovación na electromobilidade”.
Esta mesma semana, e coincidindo coa visita de Rueda a instalacións de SAIC, Bloomberg asegurou que a firma chinesa descartara Hungría como ubicación para a súa factoría europea de vehículos eléctricos, centrando as súas miradas en España.
A firma está considerada unha das catro grandes compañías estatais de automoción en China, xunto con FAW, Dongfeng e Changan. A maioría accionarial da firma atópase en mans do Goberno de Shanghái, aínda que cotiza en bolsa.
SAIC finalizou o exercicio 2025 con uns beneficios netos de algo máis de 1.200 millóns de euros ao cambio e unha cifra de negocio de algo máis de 80.000 millóns de euros. Marcou cifras récord debido á expansión internacional de todas as súas marcas e as previsións do mercado son que volva facelo este exercicio.
