A contradición de Pardo de Vera: di que non era competente para contratar á noiva de Ábalos pero si para despedila
A expresidenta de Adif sinala na súa declaración como testemuña no Tribunal Supremo polo ‘caso máscaras’ que non era competente en Ineco e que só se limitou a enviar o currículo de Jéssica Rodríguez, aínda que, cando se enterou da súa relación con Ábalos, decidiu que había que poñer fin ao seu contrato.
A expresidenta de Adif, Isabel Pardo de Vera, sae do Tribunal Supremo, a 15 de abril de 2026, en Madrid (España). Jesús Hellín / Europa Press
Comentarios
Isabel Pardo de Vera recoñeceu que enviou a Ineco o currículo de Jéssica Rodríguez, que foi parella de José Luis Ábalos, pero sen esixencias para que fose contratada. A expresidenta de Adif sinalou este mércores no xuízo no Tribunal Supremo polo ‘caso máscaras’ que chegou a chamar ao entón ministro de Transportes para dicirlle que non ía permitir a continuidade da muller ao enterarse de que tiñan unha relación, porque se daba un “conflicto de interese claro”.
Durante a súa declaración como testemuña, Pardo de Vera defendeu que ela non era competente en Ineco e que “mandar un currículo non supón absolutamente nada”.
“Eu nunca o transmitín como unha esixencia, porque non teño competencias para dar ordes ningunha a Ineco. Simplemente o que fixen con ese currículo foi trasladalo á presidenta de Ineco dicindo que chegara da parte do Gabinete do ministro”, en concreto de Koldo García, segundo indicou, e por se encaixaba nalgunha vacante, e engadiu que non coñecía de nada a Jéssica.
Pardo de Vera asegurou que tardou tempo en enterarse de que Ábalos “tivera unha relación con esa persoa” e que aí se decidiu que tocaba poñer fin ao contrato de Jéssica, porque “iso si que é un conflito de interese claro”.
“Chamei ao ministro e díxenlle que non era posible continuar a relación contractual desta persoa. Ao que o ministro me respondeu: ‘O que ti fagas, por suposto, faltaría máis, estará ben feito’. E eu aí dou por concluído isto”, relatou.
Compra de máscaras
Respecto á adquisición de máscaras, Pardo de Vera afirmou que non tivo ningunha intervención na decisión de que foran cinco millóns as unidades a mercar por Adif. “Viña xa definido” por Transportes, expresou, para engadir que descoñece se había algún estudo que xustificase esa cantidade.
“É unha orde ministerial que acota que debe ser por tramitación de emerxencia e ademais que deben ser cinco millóns. Polo tanto, Adif aí non ten ningún papel”, indicou, ao tempo que dixo que non recibiu “ningunha instrución”.
E manifestou que os resultados desa compra, que se adxudicou a Soluciones de Gestión, a empresa presunto epicentro da trama, “foron satisfactorios” e que se realizou unha análise de risco.
