A Deputación da Coruña eleva a 8 millóns o orzamento para servizos municipais, un 14% máis

A Deputación da Coruña aprobou este venres por unanimidade unha nova partida do POS+Social, a liña do Plan Único orientada a financiar e reforzar os servizos sociais municipais, que este ano aumentou ata os 8 millóns, o que supón un incremento do 14,3% respecto aos 7 millóns do ano anterior. 

Segundo destacou o presidente da Deputación, Valentín González Formoso, o “POS+Social é un apoio clave para que os municipios poidan garantir servizos sociais próximos e de calidade, que cheguen directamente ás persoas que máis os necesitan, especialmente ás persoas maiores, dependentes ou familias en situación de vulnerabilidade”.

Tal e como explican desde a Deputación, grazas a este fondo os concellos poderán financiar programas e servizos como o fortalecemento e a ampliación do servizo de asistencia domiciliaria, o servizo de almorzos a domicilio, actividades de apoio e socialización, programas de conciliación familiar e laboral, servizos de fisioterapia e terapia ocupacional, ou axuda directa a persoas e familias en risco de exclusión. 

Tamén se permite a contratación ou o fortalecemento do persoal técnico e administrativo dos servizos sociais municipais, así como investimentos en infraestrutura e equipamento social que melloren a atención á cidadanía.

Seis anos de traxectoria

A liña POS+Social naceu en 2020, o ano do estalido da pandemia, como resposta ao aumento das necesidades sociais dos concellos como consecuencia da crise sanitaria. Nos últimos anos consolidouse como unha das liñas máis importantes do Plan Único. “Co incremento deste ano a Deputación reforza a capacidade dos municipios para prestar servizos esenciais e responder á crecente demanda social”, sinalan desde a Deputación. 

“Desde a súa creación, a institución provincial investiu preto de 54 millóns de euros nesta liña, contribuíndo a fortalecer a rede pública de servizos sociais nos municipios, especialmente nos máis pequenos, que son os que teñen maiores dificultades para prestar servizos sociais debido á escaseza de recursos económicos e á dispersión e o envellecemento da poboación”.

Reparto do orzamento

O orzamento distribúese entre os concellos da provincia seguindo criterios obxectivos do Plan Único: poboación, superficie, dispersión territorial, etc. A maior parte dos fondos destínase a gastos correntes no ámbito social (salarios, horas de servizo de asistencia domiciliaria, etc.), o que permite financiar servizos esenciais do día a día que melloran directamente a calidade de vida do barrio.

A liña POS+Social forma parte do modelo de cooperación municipal da Deputación, baseado na “autonomía local e a igualdade de acceso aos servizos públicos”. Neste sentido, Formoso destacou que «estamos comprometidos cunha política social útil, próxima e centrada nas persoas, que permita aos municipios responder eficazmente ás necesidades reais dos seus barrios».

Por outra banda, a deputada de Política Social, Mar García Vidal, destacou que «o POS+Social demostrou ser unha ferramenta moi útil para dar estabilidade aos servizos sociais municipais, permitindo aos concellos planificar e manter programas esenciais para o día a día, desde o SAF ata a atención familiar ou a conciliación da vida laboral e familiar. O aumento deste ano supón máis recursos para reforzar os equipos, ampliar os servizos e chegar a máis persoas».

O POS+Social súmase a outras liñas de axuda que a Deputación Provincial da Coruña destina ao fortalecemento dos servizos sociais dos municipios da provincia, como o Plan de Servizos Sociais Comunitarios, cunha inversión que este ano alcanza os 9 millóns de euros e que permite financiar 378.000 horas de asistencia domiciliaria e contratar a 177 profesionais especializados no ámbito social nos municipios. “Este apoio da Deputación Provincial permite consolidar unha rede de servizos sociais municipais máis sólida, coordinada e con maior capacidade de resposta ás necesidades da cidadanía”.