A Xunta arroupa a UGT e carga contra a CIG: «Aliméntase do conflito»
Os conselleiros María Jesús Lorenzana e José González participaron no primeiro comité federal da federación de servizos, mobilidade e consumo de UGT e defenderon o traballo con "aqueles sindicatos que apoian a liña de acordos".
Imaxe do I Comité Federal de FeSMC de UGT Galicia / UGT
Comentarios
Nova cume entre a Xunta de Galicia e UGT. Os conselleiros de Economía e Emprego participaron como convidados na inauguración do primeiro comité federal da federación de servizos, mobilidade e consumo de UGT.
O secretario xeral de UGT-Galicia, Cristóbal Medeiros, foi o primeiro en intervir e defendeu traballar para acadar “acordos útiles” e considera que “o conflito non é un fin”, aínda que a súa organización, indicou, non o evita. A súa xuízo, este é un “momento decisivo” para os traballadores e erixiu aos sindicatos en “a ferramenta máis moderna que existe”, fronte a quen os presenta como “un dinosauro”.
“UGT serve”, insistiu, en referencia a medidas como a subida do salario mínimo interprofesional ou a redución da xornada laboral. Neste sentido, mostrou a súa aposta por unha postura “nunca dócil” fronte ao “poder”, pero na busca de “acordos útiles”.
A continuación tomou a palabra o conselleiro de Emprego, José González, quen trasladou a disposición do Goberno galego por “traballar con aqueles sindicatos que apoian a liña de acordos” e reivindicou a necesidade de organizacións como UGT ou Comisións Obreiras, que si participan no diálogo social co Goberno galego.
Críticas da Xunta á CIG
Nesta liña, José González censurou ao líder da CIG, a quen atribuíu unhas declaracións segundo as cales a central nacionalista “aliméntase do conflito”. “Folga primeiro, despois a negociación”, indicou, citando ao seu secretario xeral, Paulo Carril.
Pola súa parte, a Xunta avanza para “institucionalizar” o diálogo social, lembrou González, unha ferramenta que para a central nacionalista serve para “branquear” ao “capital”, á administración e as súas políticas.
No seu turno, a titular de Economía e Industria, María Jesús Lorenzana, que tamén puxo no foco a relevancia que para a Xunta ten o diálogo social, aplaudiu “a altura de miras” de UGT en contraposición con “outros sindicatos” que “non teñen” esta forma de actuar. “O conflito ás veces ten que existir, pero ten que ser sempre o último paso”, afirmou.
