Ence impulsa a modernización forestal con formación para mil propietarios e case 30 maquinistas

Ence destaca os “importantes fitos” que alcanzou a iniciativa da compañía que integra toda a actividade forestal no pasado exercicio. O centro de adestramento de motoserristas de Vilalba (Lugo) de Ence Terra, inaugurado en decembro de 2024, celebrou máis de 20 xornadas formativas, coa participación de 80 profesionais de Galicia, Asturias e Cantabria.

Estas xornadas, de oito horas cada unha, contribuíron a reforzar a prevención e a profesionalización nos aproveitamentos forestais vinculados a Ence Terra. A iso habería que sumar a formación de preto de 30 maquinistas forestais, que participaron en programas específicos para mellorar a concienciación preventiva e compartir boas prácticas en seguridade, ademais de afondar en aspectos relacionados co mantemento e o manexo destes equipos.

“Estes avances reforzan a aposta da compañía pola profesionalización do sector con formación especializada, investimentos en infraestruturas, impulso ao servizo de asesoramentos aos propietarios forestais, e o impulso das novas solucións tecnolóxicas”, sinalan desde Ence. 

Outros fitos 

A compañía tamén avanzou no seu plan de investimento e mellora dos parques de madeira nas biofábricas de Pontevedra e Navia. Neste sentido, puxo en marcha un servizo de taller móbil, en colaboración con talleres especializados, para atender avarías de maquinaria directamente no monte. Este servizo, apoiado nunha aplicación móbil e unha plataforma web, reduce tempos de reparación e garante a continuidade do traballo forestal. Ademais, complétase co servizo de maquinaria de substitución, que permite manter a actividade cando as reparacións requiren máis tempo.

Desde a compañía destacan o compromiso cos propietarios forestais, outro dos “piares estratéxicos” de Ence Terra, que se reforzou coa superación dos 2.350 asesoramentos gratuítos e personalizados desde o inicio do programa en 2023, preto de 1.000 deles realizados en 2025.

Estas recomendacións técnicas tiveron impacto en máis de 4.500 hectáreas, incluíndo recomendacións de fertilización axustadas a cada parcela baseadas nunha rede de máis de 1.500 mostras e análises de solos realizadas, rede que permitirá optimizar a xestión nutricional e a produtividade das masas forestais.