O Encontro de Sober reúne a máis de 400 expertos para deseñar o novo modelo económico do rural galego

A nova edición de O Encontro de Sober, que se celebrará os próximos 7 e 8 de maio no Áurea Palacio de Sober, reunirá a máis de 400 representantes de Europa, multinacionais e cooperativas para deseñar o novo modelo económico do rural galego. 

Impulsado polo Centro de Estudos Superiores Universitarios de Galicia (CESUGA) o evento foi deseñado cun formato “think tank” transversal estruturado en 15 mesas de diálogo. O obxectivo desta metodoloxía é romper os compartimentos estancos e sentar nun mesmo panel a perfís que habitualmente non coinciden: desde grandes fondos de financiamento e multinacionais, ata cooperativas gandeiras, startups tecnolóxicas e administracións públicas.

“O Encontro é, ante todo, un espazo aberto onde Galicia conecta consigo mesma. Aquí non sobra ninguén e ninguén vén a impor un relato: vimos a construílo xuntos. Sentamos á universidade, á empresa e ao territorio para pensar o futuro con ambición e activar o inmenso potencial que xa temos”, explica Venancio Salcines, presidente do Consello Reitor de CESUGA.

Da soberanía alimentaria á vivenda no rural 

O programa desta edición, articulado baixo o lema “Galicia que soña, Galicia que avanza”, porá sobre a mesa as problemáticas máis urxentes e as solucións máis innovadoras para o territorio a través dos seus verdadeiros protagonistas.

A mesa “Sen relevo non hai soberanía alimentaria: xuventude, muller e futuro do rural”, que analizará o papel das novas xeracións coas voces de Leticia Míguez de Gandería Míguez; Begoña Ferreiro, responsable de Campo do Grupo Lence; José Manuel Andrade, director da Fundación Juana de Vega; e o director xeral de Gandería, Agricultura e Industrias Alimentarias da Xunta de Galicia, José Balseiros; moderados pola xornalista Ana Peón (CRTVG).

Doutra banda, o reto habitacional e de servizos para fixar poboación abordarase en “Construíndo futuro: Vivenda, infraestruturas e servizos clave para o rural galego”, unha mesa que sentará ao eurodeputado Adrián Vázquez xunto a directivos como Diego Incio, CEO de Dest People, e Fernando Riopa, director xeral de Cobre San Rafael.

Así mesmo, o espazo analizará o peso da identidade nos negocios globais a través do panel “A Nosa Verbena: tradición e orixe como estratexia de impacto positivo”, que contará coa participación de Ramón de Meer, director de Marketing España e Portugal de Hijos de Rivera; Fernando Algueira, fundador e propietario de Adega Algueira; e Cesáreo Pardal, presidente do Clúster de Turismo de Galicia; baixo a moderación da deputada autonómica Raquel Arias.

Respaldo institucional

O programa integra un forte respaldo institucional para trazar estratexias conxuntas. José González, conselleiro de Emprego da Xunta de Galicia, clausurará as xornadas, mentres que Luisa Piñeiro, directora xeral de Planificación e Ordenación Forestal, liderará unha sesión monográfica sobre o motor madeireiro. Ademais, Nicolás Vázquez, secretario xeral de Industria, protagonizará un almorzo executivo.

O foro deseñou espazos onde a administración e a gran distribución se sentan, literalmente, cara a cara co sector primario. É o caso da mesa “Coidar o entorno, cultivar o futuro”, que reunirá a María José Gómez, conselleira do Medio Rural; Jorge Eiroa, director de Compras de Vegalsa-Eroski; Román Sánchez, coordinador da Cooperativa A Carqueixa (Tenreira Galega Suprema); Juan Luis Méndez, director xeral de ViniGalicia; e Gloria Fernández, directora de Gallega de Patacas, baixo a moderación da xornalista Marta Docampo. A eles sumaráselles perfís tecnolóxicos disruptivos que están a cambiar o campo, como Elio López (INNOGANDO) e Lara Neira (NIGAL).

Ademais diso, a Axencia Galega da Calidade Alimentaria (AGACAL) ofrecerá unha degustación exclusiva para visibilizar o impacto económico e a calidade dos produtos con Denominación de Orixe e IXP de Galicia.

“Todos estes nomes, que representan o pulso vivo da comunidade, únense ao músculo das grandes compañías tractoras que impulsan o evento (como ENCE, Acciona Energía, Grupo Lence ou Cobre San Rafael) e ao esperado seminario de intelixencia corporativa que impartirá o día 6 de maio Fulton Armstrong, ex alto cargo da CIA”.

As inscricións para profesionais e empresas que desexen sumarse a este diálogo transformador xa están abertas a través da páxina web oficial de O Encontro, onde poderán consultar tanto o programa actualizado como todos os detalles operativos e loxísticos das xornadas.