Galicia amplía a case nove millóns as axudas a emprendedores para impulsar o relevo xeracional.
A Xunta incrementou o orzamento un 33% respecto aos 6,7 millóns asignados inicialmente a estas axudas ás que poden acceder persoas traballadoras autónomas, mutualistas, pequenas e medianas empresas, cooperativas e sociedades laborais que se constituíran ou se deran de alta desde o 1 de xaneiro de 2023.
Comentarios
O Diario Oficial de Galicia (DOG) publicou a ampliación de crédito ata os 8,9 millóns de euros das axudas que están destinadas a apoiar novas iniciativas emprendedoras cuxo obxectivo é promover o relevo xeracional.
Segundo explicou a Xunta nunha nota de prensa, trátase dun incremento do 33% respecto aos 6,7 millóns asignados inicialmente. Ademais, o aumento do orzamento non afecta ao prazo de solicitude “pero permitirá que se poidan beneficiar dos apoios arredor de 800 entidades”.
Poden optar a estas axudas persoas traballadoras autónomas, mutualistas, pequenas e medianas empresas, cooperativas e sociedades laborais que se constituíran ou se deran de alta desde o 1 de xaneiro de 2023.
A orde inclúe como principal novidade o reforzo específico do relevo xeracional que garanta a continuidade de negocios viables, segundo destacou a Xunta.
Outras novidades son a simplificación dos tramos subvencionables, co fin de axilizar a xestión administrativa; e a adaptación estratéxica das inversións máximas á realidade económica dos autónomos e das pequenas e medianas empresas, “principais protagonistas do tecido produtivo galego”.
Conceptos subvencionables
“Mantéñense os conceptos subvencionables respecto a outras edicións, pero introdúcense melloras para reforzar o seu impacto entre o ecosistema emprendedor, reducindo os tramos de investimento subvencionables”, explican desde o Executivo galego. Así, aqueles situados entre 5.000 e 20.000 euros contarán cunha axuda do 55 %; os comprendidos entre 20.001 e 30.000 euros recibirán o 50 %; e os que se atopen entre 30.001 e 60.000 euros obterán o 45 % de cobertura.
Nos casos nos que o proxecto evite o peche dun negocio, a intensidade da axuda incrementarase nun 10 % adicional, facilitando así que a persoa emprendedora poida recoller o testemuño dunha actividade xa viable economicamente.
En canto aos gastos computables, inclúense equipo informático, mobiliario, eficiencia enerxética, reforma de locais, compra de activos pertencentes a establecementos existentes ou bens de equipo de segunda man, gastos notariais e de rexistro —ata un máximo de 330 euros— e aluguer que, como novidade, increméntase de 600 euros a 1.500 euros. Así, segundo o establecido na orde, as contías poderán ir de 2.750 euros ata 34.980 euros.
