O Goberno decreta o confinamento das galiñas de 40 concellos galegos.

O Ministerio de Agricultura decretou o confinamento das galiñas de 40 concellos galegos a partir do próximo luns, 10 de novembro, ante o incremento do risco pola evolución da gripe aviar.

Un informe publicado este mércores polo ministerio capitaneado por Luis Planas sinala que nas últimas semanas rexistrouse un incremento no número de casos detectados, tanto de aves silvestres como de curral, algo que evidencia unha “tendencia ao empeoramento da situación co consecuente aumento de risco para España”.

Con todo iso estimouse oportuno adoptar medidas sobre a cría de aves de curral ao aire libre, que implica que nestas localidades galegas as galiñas terán que estar gardadas en espazos pechados.

Nos casos nos que non sexa posible, sinala Agricultura que a autoridade competente poderá autorizar a mantenza destas ao aire libre mediante a colocación de telas paxareiras ou outros dispositivos que impidan a entrada de aves silvestres.

Por outro lado, as aves terán que ser alimentadas no interior das instalacións ou nun refuxio que impida a entrada de aves silvestres para evitar así o contacto cos alimentos ou a auga destinadas ás aves de curral. Ademais disto, prohibese dar ás galiñas auga procedente de depósitos aos que poidan acceder aves silvestres.

A orde de Agricultura tamén prohibe o uso de outras especies de paxaros como cebos ou a cría de patos e gansos con outras especies de aves de curral. Tampouco estará permitida a presenza de aves de curral ou outras cativas en certames gandeiros, mostras, exhibicións e celebracións culturais.

Concellos afectados

As restricións, que entrarán en vigor o próximo luns 10 de novembro, afectarán aos concellos que se atopan dentro das zonas de especial risco (ZER) e zonas de especial vixilancia (ZEV). Tras a publicación do informe na xornada do mércores, este xoves o Ministerio mantivo unha reunión técnica coa Xunta de Galicia, tal e como confirmou a Consellería do Medio Rural.

Así, están declarados como zonas de especial risco en Galicia A Illa de Arousa, Cambados, O Grove, Meaño, Ribadumia, Sanxenxo, Vilanova de Arousa, na provincia de Pontevedra; Xove, na de Lugo; e Cerceda, Ordes e Tordoia, na de A Coruña.

Como zonas de especial vixilancia están Cariño, Dumbría, Mazaricos, Ortigueira, Porto do, Son Rianxo, Ribeira, Vimianzo e Zas, na provincia de A Coruña; Ribadeo e Trabada, en Lugo; Porqueira, Rairiz de Veiga, Sandiás, Vilar de Santos e Xinzo de Limia, en Ourense; e A Guarda, Marín, Meis, Moaña, Poio, Pontevedra, Redondela, O Rosal, Soutomaior, Tomiño, Tui, Vilaboa e Vilagarcía de Arousa, en Pontevedra.