Carlos López Navaza desgrana no seu novo libro os dilemas da resolución de conflitos laborais.

Carlos López Navaza – enxeñeiro industrial, socio director de LN Consultores e profesor en Galicia Business School – presentou o seu novo libro ¿Seguimos negociando ou facemos folga? no que conta a historia dun director de Recursos Humanos que se enfronta a unha difícil negociación colectiva que serve de catalizador para que o lector se adentre nos dilemas que xorden no camiño cara á resolución dun conflito laboral.

O libro de López Navaza explora, entre outros, a importancia do diálogo, a confianza e a transparencia no ámbito empresarial e desgrana os entresixos da negociación e o impacto das decisións na vida dos traballadores/as e as empresas.

A presentación tivo lugar nun encontro celebrado en Nordés Club Empresarial, que reuniu profesionais do ámbito empresarial interesados na negociación e na xestión de conflitos nas organizacións.

A presentación do acto correu a cargo de Fernando Vázquez, CEO de Imatia e amigo persoal do autor, quen destacou a relevancia da obra no contexto actual, así como o enfoque práctico e próximo co que López Navaza aborda os procesos de negociación.

Durante a sesión, o autor, tamén colaborador de Economía Digital Galicia, compartiu algunhas das claves do seu libro, que combina narrativa e experiencia profesional para ofrecer unha visión profunda sobre a toma de decisións en situacións de conflito, poñendo en valor o diálogo como ferramenta fundamental no ámbito empresarial.

O encontro desenvolveuse nun formato de conversa, no que se foron plantexando distintas preguntas ao autor. A sesión estivo marcada por un ambiente próximo e participativo, no que tamén xurdiron anécdotas e experiencias compartidas, grazas á presenza de amigos, antigos alumnos e profesionais que coñecen de cerca a traxectoria de López Navaza.