A CIG chama á folga contra o convenio da patronal de Inditex, Primark, H&M e Uniqlo
O sindicato asegura que o preacordo con ARTE establece salarios entre 2.000 e 3.000 euros anuais máis baixos que os fixados no convenio provincial da Coruña e chegarían aos 5.000 euros no caso do persoal de nova incorporación nas tendas de Inditex.
Protesta en Pontevedra contra o convenio de ARTE ao seu paso por unha tenda de H&M / CIG
Comentarios
A CIG convocou unha xornada de folga nas catro provincias galegas contra o convenio de ARTE, a patronal das grandes multinacionais téxtiles como Inditex, H&M, Uniqlo, Primark, Mango ou Tendam. O sindicato, precisamente, chama a parar ao persoal destas compañías, alertando de que a entrada en vigor do acordo, que aínda non está asinado, suporía un deterioro dos dereitos laborais en comparación cos convenios provinciais.
Por este motivo, convocou un día de folga nas catro provincias o próximo venres, que no caso da Coruña estenderase tamén ao día 18. Na cidade herculina celebrarase unha manifestación que sairá ás 12 horas do centro comercial Catro Camiños e avanzará ata a sede da patronal, na Praza de Luis Seoane, mentres que a mobilización do día 18 será na Praza de Lugo.
A CIG manifestou desde hai tempo o seu desagrado co preacordo ao que chegaron CCOO e Fetico tras tres anos de negociación e que afectaría a máis de 100.000 traballadores en España. Os sindicatos asinantes defenden que non se produce deterioro algún nos dereitos laborais nin rebaixas salariais, xa que o texto inclúe salvagardas para que primen os acordos provinciais cando sexan mellores. UGT está na mesma posición que a CIG e tamén chamou á folga en diferentes territorios.
Os salarios e o novo convenio
Lucía Domínguez, delegada da CIG e traballadora do sector, denunciou que rubricar o convenio de ARTE implicaría a imposición de uns salarios entre 2.000 e 3.000 euros anuais, en función da categoría, dos fixados no convenio provincial da Coruña, mentres que o recorte alcanzaría os 5.000 euros para o persoal de nova incorporación nos establecementos de Inditex.
Advirte tamén que fixa unha xornada de traballo superior e pérdense dereitos como a antigüidade, licenzas, días de asuntos propios ou o complemento de ata o 100% nas baixas, así como melloras na conciliación. En cambio, elévase a flexibilidade para as empresas en aspectos como a previsión de horarios e calendarios.
Domínguez cre que a negociación do convenio estatal é unha estratexia para centralizar as relacións laborais e sindicais, facendo case imposible o diálogo no marco dos convenios provinciais de comercio variado, o que tamén prexudicará ao persoal do pequeno comercio.
