A traxectoria de Pablo Isla, de Inditex a presidir Nestlé: unha produtora, froiteiras e 25 millóns en capital risco

Tras case dúas décadas en Inditex, Pablo Isla deixou a multinacional de Amancio Ortega cun finiquito de 27 millóns e un futuro por desvelar. A pesar de contar coa elevada indemnización do xigante téxtil, o que fora elixido pola Harvard Business Review como mellor CEO do mundo non estivo parado. Ao contrario, o seu currículo seguiu engordando, aínda que por dous camiños ben diferentes. O primeiro foi o dos proxectos persoais, que teñen como bandeira a produtora audiovisual Fonte Films. Pero non se limitou á alfombra vermella, pois o expresidente de Inditex tamén aproveitou para estruturar un grupo familiar cuxo primeiro destino foi o capital risco.

Por outra banda, o que tamén fora CEO de Altadis recibiu ofertas na empresa privada, como era de esperar, e respondeu afirmativamente a algunhas. A máis ilustrativa é a última, a presidencia de Nestlé onde substituirá a partir do 16 de abril de 2026 a Paul Bulcke. En base ao salario do seu predecesor, ingresará uns 3,8 millóns por poñerse ao fronte do consello de administración do maior grupo alimentario do mundo, segundo o ranking Forbes Global 2000.

Enerxía e medios de comunicación

Isla foi nomeado conselleiro da multinacional suíza en 2018, cando aínda era o primeiro executivo de Inditex, e ascendeu a vicepresidente en abril do ano pasado. O novo cargo, no que non permanecerá nin un ano máis debido ao seu ascenso á presidencia, fixo que abandonase outro ao que accedera pouco tempo antes, tamén despois de deixar a multinacional de Amancio Ortega. Cinven, un dos tres fondos que controla MásMóvil, fichouno para liderar Green Bidco, o brazo inversor co que adquiriu Amara NZero, antiga filial de materiais eléctricos de Iberdrola.

Esta sociedade, para a que Fitch prevía uns ingresos de máis de 800 millóns anuais entre 2023 e 2026 a base de vender materiais para aeroxeradores, centrais hidráulicas e instalacións fotovoltaicas, pareceu por un momento a principal tarefa de Isla tras saír de Arteixo, pero non foi así. Ao achegarse a Cinven o directivo tivo que abandonar o seu cargo homólogo como asesor de General Atlantic, a vicepresidencia de Nestlé resultou tamén incompatíbel cos labores na presidencia de Amara NZero, que deixou pouco despois de chegar ao cargo. Fontes próximas a Pablo Isla comunicaron a EFE que as novas responsabilidades en Nestlé impedíanlle dedicar o tempo que requiría a empresa de renovables.