A viaxe empresarial da familia Mahía: de cofundadores de Caamaño a donos dun 15% de Kider

O pasado 1 de agosto cumpríronse seis anos desde que Kider Store Solutions tomase as rendas do Grupo Caamaño e o rebautizase como Kimak Solutions. Mediante este movemento, a firma vasca fixo cunha maioría accionarial dunha das compañías que acompañaron a Inditex no seu proceso de expansión polo mundo.

Porén, a finais do ano pasado materializouse unha operación en sentido contrario. E é que Kider anunciou o desembarco tanto de Mahía & Solís Invest como de Caamaño e Figueira Invest, sociedades impulsadas por Emilio Mahía (falecido en 2018) e José María Caamaño Louro, fundadores do Grupo Caamaño na década dos 80.

A través destas sociedades de investimento, os herdeiros de Emilio Mahía retiñan un 29,6% de Kimak, mentres que a familia Caamaño completaba cun 14,7% un accionariado no que sobresaía Kider con un 51,5%. Ademais destas participacións no histórico provedor galego de Inditex, as familias Mahía e Caamaño estenden os seus poderes até a propia Kider.

A firma xa anunciou a entrada de ambos no seu accionariado a finais do ano pasado e definíaa como “un paso estratéxico destinado a proporcionar unha oferta máis ampla e diversa aos seus clientes”. Agora, Kider pon números a esta participación.

As familias fundadoras do Grupo Caamaño

A memoria anual que a compañía presentou ante o Rexistro Mercantil de Álava e ás cales Economía Dixital Galicia tivo acceso a través da solución analítica avanzada Insight View revela que Mahía & Solís Invest controla agora un 15,59% do capital de Kider. É o segundo máximo accionista, só por detrás de ABM Inversiones y Capital. Esta sociedade domiciliada en Bilbao e dependente de Arieiro Invest, agora domiciliada en Madrid, foi impulsada por Jaime Bergel, un histórico do private equity en España, e conta cunha participación do 52,65%.

Trátase dun porcentaxe inferior ao 63,6% que manexaba ao termo dun 2023 no que como segundo accionista emerxía o nome de Agreste S, cun 11,31% do total.

Destarte, Mahía & Solís Invest, que en 2023 controlaba un 29,6% de Kimak (fronte ao 14,8% de Caamaño & Figueira Invest e o 51,5% de Kider) fíxose forte no capital do grupo vasco a través do “canxe de accións asesorado por Alantra” que a compañía anunciou a finais de 2024. Kimak, con sede en Madrid pero base de operacións en Culleredo, subliñaba que este movemento “busca reforzar o seu compromiso coa calidade e a innovación nas súas respectivas áreas de especialización” e que “reflicte o éxito da relación entre ambas compañías desde que, hai cinco anos, Kider adquirise unha participación de control en Kimak, mentres os socios fundadores mantiveron unha participación relevante”.

Os números de Kider

Mediante esta operación de canxe de accións, Kider convértese en socio único de Kimak mentres que as familias fundadoras do Grupo Caamaño toman posicións nunha Kider que logrou imprimir un novo empuxón á súa conta de resultados ao longo do ano 2024. Non en balde, a súa cifra de negocio repuntou un 8,9%, ata alcanzar os 58,7 millóns de euros mentres que o seu beneficio rebote catro veces máis: un 39,3%, o que lle permitiu situarse nos 10,6 millóns de euros.

Destes 10,6 millóns de euros, Kider optou por destinar 4,6 millóns a engrosar as súas reservas mentres que os seis millóns restantes canalizáronse cara aos seus accionistas en forma de dividendos, tal e como acordou o consello de administración na súa reunión do pasado mes de febreiro.

Ademais, Kider cifra en 787.847 euros o resultado neto de Kimak Solutions nun 2024 no que se fixo co 100% do seu capital. Esta cifra contrasta co beneficio neto por valor de 4,4 millóns logrado o ano anterior por parte dunha Kimak Solutions que este verán acometeu a absorción de parte dos activos da súa matriz Kider tras acometer a fusión por absorción dunha nova firma, Transitoriax Consulting, creada a partir da escisión de parte de Kider Store Solutions, cabeza do grupo vasco. Como parte desta reestruturación, Kimak procederá tamén a fusionar Caamaño Sistemas Metálicos, Metais e Mobles Especiais e Hydracorte, as súas tres principais filiais ao marxe de Citanias Obras e Servizos.