A Xunta blinda a presenza en Boiro de Jealsa, a maior conserveira galega, ata 2067

A Consellería do Mar deu luz verde a unha prórroga excepcional sobre a concesión que Jealsa, a maior conservera de Galicia, ten no porto de Bodión, no concello coruñés de Boiro. Así se detallou este martes tras a reunión do Consello da Xunta na que se sinalou que a concesión autorizada amplía o seu prazo de vixencia ata os 75 anos, o máximo legal permitido, e fará que a industria se manteña no lugar ata 2067.

A ampliación da concesión autorizada por Portos de Galicia dá resposta a unha solicitude da empresa no marco da modificación legal da Lei de Portos de Galicia que entrou en vigor o 1 de xaneiro de 2025 e que permite o tope máximo do prazo de vixencia das concesións sempre que a ampliación se acompañe dunha inversión proporcionada.

Segundo explican desde o Executivo autonómico, a ampliación foi outorgada en base “á xustificación por parte da empresa dos requisitos legais preceptivos: o interese estratéxico da concesión e a inversión proporcional ao incremento de prazo”.

Sobre o primeiro deles, definen a declaración da concesión como “estratéxica, de especial relevancia para a actividade portuaria e baséase nos datos de emprego do grupo empresarial”. Neste sentido, lembra que a compañía xera na súa sede e centros de traballo no Barbanza un total de 3.000 empregos directos, cun incremento interanual do 11 %, e preto de 12.000 indirectos. “Ademais, ten un porcentaxe de emprego feminino do 72 % e xustifica un enfoque inclusivo cara ás persoas con discapacidade integrando a 34 no seu cadro”.

Respecto á inversión prevista, que segundo a lei terá que superar os 500.000 euros, Jealsa acometerá as obras necesarias para renovar a cuberta do edificio principal para eficiencia enerxética e para levantar unha nova nave, que suporá unha achega de 3,2 millóns de euros.

Por outro lado, tamén ten prevista “a reconstrución dunha nave industrial incendiada anos atrás cunha inversión prevista de 4,8 millóns, polo que propón unha inversión total na comarca do Barbanza para os próximos anos de 8 millóns”.