Navantia ‘matiza’ ao seu presidente e indica que non busca “neste momento” un socio privado

• Navantia aspira a ser como Naval Group, do Estado francés e cun 35% en mans do xigante da defensa Thales.
• O presidente de Navantia abre a porta á entrada de capital privado

Navantia tivo que matizar as palabras do seu presidente, Ricardo Domínguez, que este luns abriu a porta á entrada dun socio privado nun futuro. Fontes da compañía pública de construción naval indican que, con respecto ás palabras do seu máximo directivo nun foro, “aclarar que se trataba dunha reflexión a futuro no contexto da industria en Europa, pero non é un escenario que se estea a plantexar neste momento”. “Foi unha resposta a unha pregunta que lle fixeron nun foro”, argumentan.

Este luns, Ricardo Domínguez causou sorpresa no sector ao indicar que a entrada de capital privado en Navantia é algo que “debería chegar” a longo prazo, nun escenario de maior investimento en defensa. O executivo foi máis alá, e puxo como exemplo, a estrutura da compañía francesa Naval Group, un xigante liderado polo Estado francés, pero cuxo 35% do capital está en mans dunha empresa tecnolóxica, Thales. Esta última, aínda que cotizada, tamén conta coa administración pública como primeiro accionista.

“Privatización encuberta”

As palabras de Domínguez foron este martes rexeitadas polos sindicatos. Comisiones Obreras indicou que esas declaracións son “un intento de xustificar problemas de xestión”. Víctor Ledo, responsable estatal do sector naval de CC OO Industria, denunciou que a “subcontratación masiva” de Navantia xa constitúe “unha privatización encuberta” de gran parte da actividade.

Por outra banda, a formación Ferrol en Común tamén advertiu mediante unha nota de prensa que falar de privatización supón priorizar a rendibilidade económica por riba do emprego, as condicións laborais e o futuro industrial da comarca. “Ferrol xa coñece as consecuencias de décadas de desmantelamento industrial”, sinalou.