Aernnova sae de novo ao rescate da galega Coasa tras perder case oito millóns en dous anos
O grupo vasco inxectou outros tres millóns de euros á ourensá Coasa, que pulverizou os 41 millóns de facturación grazas aos seus encargos para xigantes aeronáuticos como Airbus ou Embraer.
Imaxe de arquivo das instalacións de Coasa en San Cibrao das Viñas
Comentarios
Nova inxección millonaria de Aernnova á galega Coasa. O grupo vasco achegou outros tres millóns de euros á súa filial ourensá despois de que esta volvese pechar en números vermellos.
E é que o fabricante de compoñentes para avións despedíu o seu exercicio fiscal 2024 con unhas perdas por valor de 4,95 millóns de euros. A cifra supón un novo salto respecto aos 2,63 millóns de euros que Coasa se deixara en 2023.
A compañía especializada na produción de pezas estruturais (como seccións de ás e fuselaxe) non logrou traducir o seu repunte de vendas en maior rendibilidade. Non en balde, os seus ingresos disparáronse un 20,3%, ata acadar os 41,06 millóns de euros.
Subida dos gastos
“No exercicio 2024 continuou a recuperación do sector. O tráfico aéreo mundial de curto percorrido alcanzou os niveis previos á crise a finais do exercicio. Por outra banda, os principais fabricantes de avións incrementaron a súa carteira de pedidos”, destaca Coasa no seu informe anual, no que revela que este crecemento en materia de ingresos foi inferior ao protagonizado por algunhas das súas principais partidas de gasto.
Este é o caso dos seus aprovisionamentos, que ascenderon a 27,33 millóns de euros, o que representa un incremento do 27,6%. Os gastos de persoal, pola súa banda, elevaronse de 11,5 a 14,11 millóns de euros nun ano (un 22,6% máis) despois de que o número medio de empregados rexistrase un ascenso de 347 a 378.
Este novo aumento na súa estrutura de custos lastrou a conta de resultados de Coasa, que desta forma xa acumula máis de 7,6 millóns de euros en perdas en dous anos e tería pechado con patrimonio neto negativo de non ser polo rescate da súa propietaria, Aernnova.
Esta inxectou nove millóns nos dous últimos anos, o que permitiu que o patrimonio neto de Coasa pasase de 4,86 a 8,91 millóns de euros. “A sociedade ten garantidas en todo momento as súas necesidades de liquidez mediante a financiación recibida do socio único, o cal manifestou expresamente que prestará o apoio financeiro para posibilitar que a sociedade cumpra cos seus compromisos e obrigas de pago e
asegurar a continuidade das súas operacións”, destaca Coasa na súa memoria anual.
A firma ourensá mantén unha débeda a curto prazo de algo máis de 10 millóns coa súa matriz, á que se suman outros 1,54 millóns de euros en concepto de pasivos financeiros con entidades de crédito.
O selo de Coasa
“A presenza do grupo Aernnova nos principais programas de aviación comercial garante o crecemento do negocio acompañando aos nosos principais clientes”, apunta Coasa sobre a súa propietaria. Ao abeiro da firma vasca, Coasa logrou facerse un oco como un dos provedores de referencia de Airbus en España. Para o seu A350, a empresa encárgase de producir o estabilizador horizontal (HTP), os elevadores, o timón de dirección, a toma de aire monolítica e elementos da á como o Wing Tess.
Ademais, Coasa participa na fabricación de tapas NE0330 e do sistema MLGD (portas do tren de aterraxe principal) do programa do Airbus A330. Pola súa banda, no Airbus A320, a actividade céntrase na produción do MLGD e das seal plates. Ademais, a compañía colabora con Embraer en distintos programas. Entre eles, as familias E-Jet, E2, o avión militar Embraer KC-390 e os jets executivos Embraer Praetor 500 e Embraer Praetor 600.
