Altri presume de lograr unha distinción de Bruxelas que lle abre a porta a financiamento europeo.

Altri saca peito e anuncia que o seu proxecto dunha planta celulósica e de fibras téxtiles en Palas de Rei acaba de recibir un selo da Comisión Europea que o distingue como estratéxico e ábrelle a porta a, no futuro, poder acceder a axudas estatais e de organismos como o propio Banco Europeo de Inversión (BEI). Todo isto nun momento especialmente comprometido para o desenvolvemento da súa proposta que, en España, quedou, polo menos de momento, sen conexión á rede ao non contar a súa zona con reforzos previstos na planificación eléctrica do Ministerio para a Transición Ecolóxica cara a 2030 e sen axudas dentro vía Perte.

Mediante un comunicado, a compañía lusa indica que a Agencia Executiva de Clima, Infraestruturas e Medio Ambiente (CINEA) “outorgou ao proxecto Gama o selo STEP (Plataforma de Tecnoloxías Estratéxicas para Europa)”. “Trátase dunha etiqueta de calidade outorgada pola Comisión Europea destinada a facilitar o acceso a oportunidades de financiamento no marco dos programas da UE incluídos nesta iniciativa e coa que a axencia europea recoñece ao proxecto de fibras téxtiles de Altri como estratéxico para mellorar a competitividade industrial da UE. Ademais, o selo STEP permite o acceso do proxecto Gama a medidas de axuda estatal previstas no Pacto Industrial Limpo”, asegura.

Sen axudas directas pero con acceso a financiamento

Altri explica que presentou o proxecto de fibras téxtiles de Palas de Rei á convocatoria Innovation Fund, “obtendo unha alta puntuación nun proceso de avaliación altamente competitivo desenvolvido por un panel internacional de expertos independentes”. Con todo, o proxecto non recibiu axudas públicas.

Explica a compañía que no documento de resolución, o CINE indica que “a pesar dos seus méritos, o proxecto Gama non pode ser financiado debido aos recursos presupostarios dispoñibles para esta convocatoria”. Asegura que “a non aportación de fondos non obedece a ningún incumprimento coa lexislación ambiental europea” e destaca que, así ao contrario, ábrelle a porta á busca de financiamento. “No mesmo escrito sinala que o proxecto foi considerado de alta calidade e impacto, e poderá ser remitido ao Banco Europeo de Inversións (BEI), se así o desexa o promotor, para o seu posible desenvolvemento mediante a Asistencia ao Desenvolvemento de Proxectos (PDA)“, indica.

“O selo STEP posiciona ao proxecto como prioritario dentro dos instrumentos de financiamento e programas europeos existentes, no marco das políticas de competitividade, transición verde e dixital da Unión Europea”, insiste.

A compañía, que quedou fóra das axudas do Goberno central ao Perte da Descarbonización, reivindica o seu proxecto en Galicia. “A avaliación á que se someteu o proxecto neste proceso pon de relevo que a innovación do proxecto é sólida, críbel e ben fundamentada e considera que a documentación presentada define ben o escenario de referencia e o do proxecto, con factores de emisión críbeis e trazables. Así mesmo, sinala que se xustifica que a fibra lyocell substituirá un 77,5% de fibras sintéticas e un 22,5% de algodón”, indica a compañía.

“Sacamos un notable no exame europeo, o que vén a refrendar o que temos dito sempre: que GAMA é un proxecto serio, rigoroso, sostible e innovador, deseñado para dar resposta á necesidade do sector téxtil de contar con fibras respectuosas co medio ambiente e 100% biodegradables, en liña cos requirimentos da Unión Europea”, di o CEO da cotizada lusa, José Pina.