Actualizado
Comentarios
Amancio Ortega supera por pouco en Forbes ao recentemente ‘xubilado’ Warren Buffet en pleno rally de Inditex.
O fundador de Inditex ascende ao noveno posto da lista de millonarios do mundo actualizada a tempo real cun patrimonio de algo máis de 126.000 millóns de euros.
Amancio Ortega, nunha imaxe de EFE en Casas Novas, coa sede de Inditex en Arteixo ao fondo.
Comentarios
Durante a tarde deste martes, Amancio Ortega, o fundador de Inditex, alcanzou o posto número 9 das grandes fortunas do mundo, segundo o índice actualizado a tempo real por Forbes. A lista fluctúa con rapidez, debido aos movementos en bolsa das grandes compañías detrás dos maiores patrimonios do planeta. O pai de Marta Ortega rematou a xornada cunha carteira estimada en 146.900 millóns de dólares, segundo a publicación, algo máis de 126.131 millóns de euros ao cambio, e practicamente empatado co recentemente xubilado Warren Buffet, que ao longo da xornada viu como a estimación da súa fortuna retrocedía máis que a do creador de Zara.
Catro postos en pouco máis dun mes
En calquera caso, máis alá da peculiaridade de adiantar na lista Forbes ao Oráculo de Omaha, a posición de Ortega Gaona no coñecido índice de ricos mundiais non evidencia senón o rally que experimenta Inditex desde o pasado decembro. Só un dato, a finais de novembro do ano pasado, antes de que a téxtil presentase os resultados correspondentes ao seu terceiro trimestre fiscal, cos que recobrou o favor do mercado, o pai de Marta Ortega ocupaba o posto número 13 dos máis ricos do globo, cun patrimonio estimado en case 110.000 millóns de euros.
O patrimonio de Ortega depende directamente da boa saúde de Inditex. Non só dos seus resultados e os dividendos que reparte, senón do seu valor en bolsa, xa que é posuidor de case un 60% do capital da téxtil.
Avance en bolsa de Inditex
A foto fixa do Ibex indica que o 2 de decembro, día anterior á presentación de resultados trimestrais, Inditex pechou coa acción a pouco máis de 49 euros e cunha capitalización de 152.934 millóns. Este martes, a cotizada rematou a sesión no Ibex co título intercambiándose a 57,12 euros e cunha capitalización de máis de 178.000 millóns de euros.
Inditex tivo este martes unha pequena corrección, ao caer a acción un 0,17% despois do rebote dun 1,35% co que arrancou a semana. Pese ao retroceso, a multinacional con sede en Arteixo segue mantendo o apoio da maioría dos analistas. Este luns, sen ir máis lonxe, Bernstein emitiu un novo informe sobre o valor no que situaba o prezo obxectivo da acción en 60 euros, unha cifra que Royal Bank of Canada a leva ata os 62 euros. De alcanzar esa cifra, a capitalización bursátil da téxtil iríase por riba dos 193.232 millóns de euros.
A matriz de Zara, debido ao seu arreón de inverno, converteuse en a sétima compañía máis valiosa da zona euro. Directamente por riba dela colócase L´Oreal, cun valor bursátil que se aproxima aos 210.000 millóns de euros.
A xubilación do gurú das finanzas
Aínda que este martes Amancio Ortega perdeu diñeiro na estimación da súa fortuna pola leve caída de Inditex en bolsa, avanzou na lista Forbes porque Buffet perdeu máis, en concreto uns 654 millóns de euros, só en 0,44% da súa fortuna, co que se coloca, momentaneamente, como o millonario número 10 do mundo.
Por riba de Ortega, no posto número 8, Jensen Huang, da tecnolóxica Nvidia, cunha fortuna estimada en 160.300 millóns de dólares.
De 95 anos, o histórico gurú dos investidores, decidiu abandonar o seu cargo como CEO de Berkshire Hathaway co novo ano, deixando como substituto a un home da casa, Greg Abel.
A finais do ano pasado, en medio da súa despedida empresarial, o empresario anunciou o traspaso de parte das accións do seu imperio –que ten como valores de investimento tradicionais a xigantes como Apple, Bank of America ou American Express, e máis recentemente en Alphabet— ás catro fundacións da súa familia. Estaban valoradas en uns 1.100 millóns de euros ao cambio.
