Así é ‘Atlantic Arc’, o proxecto de conectar Lisboa e Burdeos con 2.000 quilómetros de fibra óptica
A empresa galega Rede Aberta desenvolverá os estudos para implantar unha rede troncal de fibra óptica terrestre de alta capacidade de 2.000 quilómetros que conecte o arco Atlántico.
Comentarios
Rede Aberta desenvolverá o proxecto Atlantic Arc, que permitirá realizar o estudo dunha rede troncal de fibra óptica terrestre de alta capacidade para conectar Burdeos (Francia) con Sines e Lisboa (Portugal), pasando polas comunidades de Euskadi, Cantabria, Asturias e Galicia, cunha lonxitude superior aos 2.000 quilómetros.
O proxecto, seleccionado pola Comisión Europea dentro do programa CEF Digital (Conectar Europa), pretende establecer as bases para a construción dunha rede troncal ao longo do corredor Atlántico para interconectar cidades clave de Francia, España e Portugal e superar as carencias en conectividade dixital. Ademais de ser unha rede troncal, achegará capilaridade porque dela saíran ramificacións que incrementarán a conectividade en zonas rurais desatendidas ao longo do corredor.
O Atlantic Arc creará infraestruturas dixitais de alta capacidade para mellorar a conectividade tanto dentro de Europa como con terceiros países. Así, establecerá as bases para despregar unha rede terrestre de fibra óptica que conecte os cables submarinos (estacións de amarre de cables), centros de datos e hubs dixitais.
Cables submarinos
Segundo trasladou a empresa nun comunicado, “o proxecto pretende crear un ecosistema dixital terra-mar que optimice os fluxos de datos transcontinentais, coa conexión directa das cidades atlánticas ás que chegan os cables submarinos, xunto coa integración cos principais centros de datos rexionais para facilitar a computación de alto rendemento e servizos na nube”.
Entre os efectos positivos da infraestrutura estaría o de mitigar os riscos de saturación das redes existentes e proporcionar enlaces fiables de alta capacidade, diversificando as rutas tradicionais existentes e reducindo a dependencia dos cables submarinos. Esta rede permitiría conectar as estacións de amarre de cables de Lisboa, Sines, Santander, Bilbao e Burdeos.
Enerxía renovable
Atlantic Arc pretende aproveitar a aposta de todo o Arco Atlántico pola xeración de enerxía mediante a eólica terrestre e mariña, o que permite utilizar esta fonte enerxética de orixe sostible e renovable para a construción de centros de datos, xa que contribúe a minimizar o impacto medioambiental.
A rede troncal conectará as cidades de Sines, Lisboa e Porto (Portugal) con Vigo, A Coruña (Galicia), Xixón (Asturias), Santander (Cantabria) e Bilbao (País Vasco), ademais de Baiona e Burdeos (Nova Aquitania, Francia). En conxunto, beneficiará o territorio das rexións do arco atlántico que suman máis de 19 millóns de habitantes e un PIB de case 620.000 millóns de euros.
Unha “autoestrada de datos”
Pere Antentas, CEO de Rede Aberta, destacou que a decisión da Comisión Europea de seleccionar este proxecto dentro do programa CEF Digital reforza o compromiso da compañía “coa mellora da conectividade no eixo atlántico europeo”. Así, asegurou que contribuirá ao “fortalecemento da conectividade europea, dando así un paso decisivo cara a un corredor dixital máis resiliente, competitivo e preparado para o futuro en toda a rexión atlántica”.
Antentas explicou que “o Atlántico Europeo ten auga, enerxía renovable en abundancia e moito talento”. “Se a estes recursos naturais e ao coñecemento dixital da rexión lle sumamos unha autoestrada de datos infinita, iso suporá no futuro un desenvolvemento social e económico sen precedentes. A inversión da infraestrutura non será cuantitativa, senón que será cualitativa e cun retorno infinito”, engadiu.
