Central Lechera Asturiana, Unirisco e a consultora de Carlos Negreira apoian a expansión da ‘foodtech’ Sensesbit
A compañía, que xa opera en máis de 10 países onde colabora con algunhas das principais empresas do sector alimentario en Europa e Latinoamérica, pecha unha rolda de financiamento dun millón na que tamén participaron Clave Capital, Eoniq Fund.
De esquerda a dereita, Rubén Hidalgo, director de Investimento de Impacto de Central Lechera Asturiana; Maruxa Quiroga, CEO e cofundadora de Sensesbit; Inmaculada Rodríguez, CEO de Unirisco; Antonio Tornero, Investment Manager en Clave Capital
Comentarios
Paraíso Natural Ventures, o vehículo de investimento de Central Lechera Asturiana, e WindOne, a consultora do exalcalde da Coruña Carlos Negreira, participaron xunto con Clave Capital e Eoniq Fund nunha rolda de financiamento dun millón de euros de Sensesbit, a ‘foodtech’ participada pola Universidade de Santiago (USC) e Unirisco especializada en análise sensorial avanzada.
Sensesbit é a primeira plataforma de Intelixencia Sensorial con Intelixencia Artificial para a industria alimentaria, deseñada para axudar ás compañías a desenvolver produtos con maior probabilidade de éxito e reducir a fenda entre o que a industria produce e o que o consumidor realmente desexa. Fundada por catro científicas procedentes dun grupo de investigación da USC, transformou máis de 25 anos de investigación en análise sensorial e percepción do consumidor nunha plataforma SaaS que digitaliza, estandariza e amplifica a toma de decisións en innovación, calidade e desenvolvemento de produto.
Desde 2026, Sensesbit integra IA axéntica, incorporando axentes intelixentes capaces de analizar grandes volumes de información sensorial, identificar patróns, xerar recomendacións e asistir aos equipos na toma de decisións estratéxicas con maior rapidez, precisión e obxectividade. O ano pasado foi recoñecida como a startup máis innovadora nos Ftalks Food Summit Startup Awards 2025.
Anticipar o que o consumidor sente
Maruxa Quiroga, CEO e cofundadora de Sensesbit, muller STEM e doutora en Análise Sensorial, explicou que “durante décadas a industria optimizou custos, procesos e produción”. “O seguinte gran salto competitivo será entender, medir e anticipar o que o consumidor sente. Esa é a misión de Sensesbit, converter a Intelixencia Sensorial no novo estándar para a toma de decisións estratéxicas da industria alimentaria”.
A ‘foodtech’ española opera xa en máis de 10 países, onde colabora con algunhas das principais empresas do sector alimentario en Europa e Latinoamérica, e traballa con máis de 100 clientes industriais recorrentes. A plataforma converteuse nunha ferramenta crítica dentro dos procesos de innovación e calidade, evolucionando cara a un sistema estratéxico transversal para toda a organización.
“Non só analizamos percepcións, traducimos ciencia en decisións con impacto financeiro. Unimos coñecemento científico e intelixencia artificial para que as compañías produzan exactamente aquilo que o consumidor está disposto a mercar de novo”, sinalou Maruxa Quiroga.
Os recursos da rolda de financiamento tamén permitirán escalar as capacidades de IA aplicada á análise sensorial e á toma de decisións estratéxicas. Ademais, contribuirá a reforzar o equipo en áreas clave como produto, data science e desenvolvemento de negocio.
A análise sensorial era unha disciplina científica, ata agora, difícil de escalar, lenta e altamente dependente de expertos. “Sensesbit transformou ese coñecemento nunha plataforma SaaS con Intelixencia Artificial capaz de digitalizar, estandarizar e amplificar a toma de decisións da industria”, explican desde a compañía.
Cada ano, a industria alimentaria lanza miles de produtos ao mercado, pero unha parte significativa fracasa. A razón reside en que existe unha fenda estrutural entre o que a industria produce e o que o consumidor realmente desexa. E no centro desa fenda está a experiencia sensorial. “O sabor é o principal motivo de recompra. Se o consumidor non conecta sensorialmente cun produto, non volve”, subliñou Maruxa Quiroga.
