Cobre San Rafael renuncia ás axudas da Xunta a empresas mineiras pola “tardanza” na concesión de permisos.
A compañía comunicou á Administración galega a súa renuncia ás axudas "dada a tardanza na concesión dos permisos", motivo polo que "acabou por tomar a decisión de seguir adiante coas melloras previstas con financiamento propio".
Imaxe da mina de Touro e O Pino que promove Cobre San Rafael.
Comentarios
Cobre San Rafael, a compañía que promove o proxecto mineiro de Touro-O Pino, comunicou á Xunta que renuncia ás axudas destinadas a empresas mineiras para liñas de protección ambiental, publicadas este xoves polo Diario Oficial de Galicia (DOG), debido á “tardanza” na obtención de permisos.
A Consellería de Economía e Industria concedeu axudas por máis de 2 millóns de euros a empresas mineiras para subvencionar cuestións como protección ambiental, mellora de condicións laborais e investimentos de certificación.
Segundo a publicación no Diario Oficial de Galicia (DOG) deste xoves, Cobre San Rafael recibiría unha subvención de 100.000 euros, para a “execución do tratamento pasivo”, outra de 12.577,50, para un laboratorio analítico de pasivos ambientais, e outra de 877,50 euros para a “renovación de certificación UNE 22480-22470”.
Entre as adxudicatarias tamén se atopa Explotacións Galegas S.L, compañía do fundador da construtora Francisco Gómez e Cía, falecido o pasado outubro, que constituíu Cobre San Rafael con Atalaya Mining como socio. Neste caso a axuda ascende a 100.000 euros e será destinada á “adaptación de vestiarios Touro”.
Tal e como adianta Europa Press, desde Cobre San Rafael sinalan que no ano 2020 puxo en marcha o actual plan de reestruturación integral das augas da antiga mina de Touro (clausurada en 1986), cunha investimento ata a data de 3,4 millóns de euros. Apunta que se trata dunha iniciativa “voluntaria” que “non responde a unha esixencia legal, xa que a compañía nestes momentos non ten operación”.
Segundo explican, as axudas publicadas no DOG deste 4 de decembro “están vinculadas a este plan de restauración”, polo que “non teñen relación co proxecto industrial mineiro nos concellos de Touro e O Pino que se atopa nestes momentos en tramitación”.
Con todo, asegura que a compañía “xa comunicou á Administración galega a súa renuncia a ditas axudas dada a tardanza da concesión dos permisos, polo cal acabou por tomar a decisión de seguir adiante coas melloras previstas con financiamento propio”.
Cobre San Rafael garante que “as actuacións voluntarias postas en marcha no plan de restauración integral das augas da mina histórica están producindo un impacto ambiental positivo e sostido”.
