O Congreso dos Deputados pon data á votación do traspaso da titularidade da AP-9 á Xunta de Galicia. A Cámara Baixa acelerou a tramitación da lei da AP-9 para pechar a súa transferencia e decidiu incluír o debate e a votación desta norma no Pleno da próxima semana.

Así o asegura a axencia Europa Press, que lembra que este martes reuniuse a Comisión de Transportes para aprobar o informe da lei da AP-9, que saíu adiante a pesar do rexeitamento do PP e Vox. Agora, a norma continúa a súa tramitación parlamentaria e previsiblemente quedará aprobada o próximo xoves no Congreso e remitirase ao Senado.

Trátase dunha proposta que xurdiu do Parlamento de Galicia, aínda que se desbloqueou hai unhas semanas grazas ao acordo entre o PSOE, BNG e Sumar para incluír non só a xestión senón tamén a titularidade da vía á Xunta de Galicia.

O novo texto que xurdiu tras o acordo deu pé a unha proposición de lei orgánica, que segue a súa tramitación nas Cortes ata que o traspaso poida ser negociado nunha comisión bilateral entre Xunta e Goberno central. Aínda que os socialistas presentaran unha emenda que evitaba a titularidade, o novo texto pactado sitúa como obxectivo da lei “a transferencia á Comunidade Autónoma de Galicia da titularidade da AP-9 e as competencias sobre o réxime xurídico da concesión, así como as funcións e servizos da autoestrada AP-9 á Comunidade Autónoma de Galicia”.

Para iso, determínase que a Administración Xeral do Estado e a comunidade elevarán á Comisión Mixta de Transferencia unha proposta de acordo que determine as condicións e límites para a transmisión de competencias ata agora exercidas pola Administración estatal en relación coa Autoestrada do Atlántico, o que será aprobado por real decreto.

A letra pequena do traspaso

A proposta de acordo deberá abordar as condicións do traspaso de varias funcións, empezando pola autorización da posta en servizo de novos tramos, adaptacións ou reformas dos existentes, así como de enlaces e vías auxiliares da autoestrada.

Tamén concretará como se materializa a supervisión e inspección do correcto funcionamento da autoestrada, conforme á normativa xeral de estradas e aos prazos que rexen a concesión; así como a potestade sancionadora respecto a incumprimentos da concesionaria na explotación da AP-9.

Así mesmo, abordará os termos para as modificacións que afecten ao réxime económico-financeiro da concesión, “singularmente no que atinxe ao establecemento, actualización e supresión das tarifas e peaxes, así como a aplicación de programas de desconto, incluíndo a autorización daqueles que sexan voluntarios a instancia da concesionaria”; e para a redacción e aprobación de convenios, ou addendas aos actuais.

De acordo co texto pactado, a Administración Xeral do Estado conservará a súa cargo, con respecto á sociedade concesionaria da autoestrada AP-9, as obrigas con repercusións económicas e financeiras derivadas da aplicación da concesión en vigor que foran motivadas por modificacións adoptadas no período en que tivo a competencia e cos límites económicos vixentes á data da aprobación do traspaso.

Neste sentido, as consecuencias das decisións tomadas pola Administración estatal previas á transferencia recaerán sobre a mesma. O acordo da transferencia deberá establecer “a obriga da aprobación das revisións ordinarias ou extraordinarias de tarifas que ditas modificacións teñan establecido, co fin de que estes límites económicos sexan respectados”.

Está previsto que a Xunta asuma “todas as obrigas con repercusións económicas e financeiras consecuencia das modificacións que sobre o réxime económico financeiro da concesión promova unha vez efectivo o traspaso”.

Finalmente, as modificacións que sobre o réxime económico financeiro da concesión queira promover a Comunidade Autónoma non poderán afectar aos compromisos económicos previstos e “calquera decisión que supoña un incremento destes compromisos deberá ser asumida íntegramente pola comunidade na cantidade que este incremento supoña”.