Ence propón 39 saídas en Pontevedra con baixas incentivadas e prexubilacións.

Ence propón a saída de 39 traballadores da súa planta de Pontevedra no marco do Plan de Eficiencia e Competitividade que puxo en marcha a compañía ata 2027 tras encadear catro trimestres en números vermello. A estratexia tiña como piares esenciais a implementación de solucións de Intelixencia Artificial, reenxeñería e automatización de procesos; así como a racionalización dos procesos operativos. Entre as medidas a adoptar estaba unha redución ordenada da estrutura de persoal, que afecta fundamentalmente ao negocio da celulosa.

Na negociación cos traballadores, Ence proporá en Pontevedra esas 39 saídas, o que supón un 6,5% da plantilla da biofábrica. Segundo trasladou nun comunicado, está disposta a levar a cabo prexubilacións e baixas incentivadas, e tampouco descarta ofrecer recolocacións en outras plantas do grupo. Fontes próximas á negociación apuntan que nas instalacións de Lourizán hai 20 persoas que poderían acollerse ás prexubilacións, mentres que as outras 19 baixas produciríanse ao final do proceso, no último trimestre de 2027.

“Ence reitera a súa vontade de diálogo para alcanzar unha solución consensuada coa representación legal dos traballadores. Proba diso é que ofreceu non iniciar o período de consultas do procedemento de despedimento colectivo e abrir, durante 30 días, un proceso de negociación previo e informal co comité da biofábrica de Pontevedra”, di a compañía nun comunicado.

Avance en Navia, atasco en Pontevedra

Este proceso de negociación previo e informal xa se abriu en Navia, trasladando estas mesmas ideas aos representantes dos traballadores, é dicir, a vontade do grupo de paliar os efectos das saídas con prexubilacións e baixas incentivadas. En Pontevedra, o comité de empresa negouse ata o momento a abrir calquera vía de negociación

Ence lembra que, en paralelo ao Plan de Eficiencia e Competitividade, continúa o proxecto Pontevedra Avanza, cunha inversión orzamentada de 120 millóns de euros. Esta iniciativa fará posible producir e subministrar, desde Pontevedra, “produtos celulósicos especiais da máis alta calidade, que aportarán maior marxe e serán capaces de substituír á fibra longa e aos plásticos en multitude de aplicacións”.