Euroespes anuncia unha nova reestruturación e a creación dunha filial para saír da súa crise

Nova folla de ruta en Euroespes. A biotecnolóxica con sede en Bergondo deu luz verde na súa xunta xeral extraordinaria de accionistas ao plan co que busca sanejar as súas contas e saír da súa particular crise.

Segundo comunicou a firma a través dun feito relevante remitido ao BME Growth, índice no que cotiza desde febreiro de 2011, esta xunta na que se congregou o 74,35% do capital social aprobou por unanimidade que se deixe sen efecto a proposta de aumento de capital á que dera luz verde o consello de administración.

Os accionistas da empresa respaldaron o plan presentado pola sociedade International Agency for Brain Research and Aging, vinculada á familia Cacabelos. Con ela ofrécense “dúas opcións de participación na sociedade, sendo as opcións non excluíntes unha da outra, de tal xeito que os accionistas e investidores poidan escoller entre seguir unha delas ou ambas de forma simultánea”.

Euroespes propón unha ampliación de capital dun millón de euros mediante a emisión e posta en circulación dun máximo de 2,857 millóns de títulos de 0,35 euros de valor nominal. No caso de que esta operación se subscriba na súa totalidade, Euroespes pasaría a contar cun capital social de 8,11 millóns de euros repartidos en 14,69 millóns de accións. Destas, 11,83 millóns pertencen á clase A (de 0,6 euros de valor nominal) e as 2,857 millóns restantes, á clase B (de 0,35 euros cada unha).

“As accións de clase B conferirán ao seu titular un dereito de voto limitado na xunta xeral. A estes efectos, será necesario ostentar dúas accións de clase B para a atribución dun voto”, explica a firma.

Novos investidores e creación dunha filial xenómica

No documento remitido ao BME Growth, Euroespes subliña que “a oferta das accións estará destinada a investidores cualificados tanto residentes en España como fóra dela” e avanza unha modificación do artigo cinco dos seus estatutos sociais, “que será redactado conforme á realidade das subscricións e desembolsos realizados”.

Tras dar luz verde a este plan, será o consello de administración de Euroespes quen fixe as condicións desta ampliación de capital, estableza a data de colocación das novas accións e leve a cabo o proceso de procura de novos investidores. Esta folla de ruta difire da plantexada inicialmente polo máximo órgano de representación de accionistas da compañía.

E é que a través dun comunicado o pasado mes de xaneiro, Euroespes anunciaba a súa proposta de “iniciar os procedementos para aumentar capital nun millón de euros mediante a creación de 1.663.860 accións dun valor nominal de 0,601012 euros e mediante achegas dinerarias”. O obxectivo era “dotar de fondos á compañía para afrontar os pagos derivados do convenio de acredores e mellorar a súa situación patrimonial”.

Ademais de cambiar os prezos (de 0,6 a 0,35 euros por acción) e de crear accións de clase B, a empresa que capitanea o doutor Ramón Cacabelos tamén propón agora aos seus accionistas a opción de adquirir “participacións dunha sociedade filial a crear por Euroespes,
denominada Xenomium SL, e centrada en desenvolver proxectos innovadores de xenómica”.

Trátase dunha liña de negocio paralela á súa principal actividade: a asistencia médica. A empresa ten o foco no diagnóstico, tratamento e medicina preventiva con especialización en enfermidades neurolóxicas, así como casos de Parkinson ou Alzheimer. Euroespes tamén ten unha liña biotecnolóxica con fármacos experimentais e unha división nutracéutica, con produtos como o Makalisex, coñecido popularmente como o Viagra galego.

A crise de Euroespes

Mediante esta nova folla de ruta, Euroespes intentará endereitar o rumbo tras varios anos marcados pola sombra do concurso de acredores. Euroespes solicitou a finais de 2023 a súa entrada en concurso voluntario de acredores tanto da matriz como da súa filial Euroespes Biotecnoloxía, despois de constatar «a imposibilidade» de lograr un acordo de reestruturación dunha débeda que por aquel entón rondaba os cinco millóns de euros.

A medida supuxo a suspensión temporal de cotización no BME Growth. Euroespes logrou saír do concurso de acredores no verán de 2024 tras acordar un plan centrado na redución de custos e a venda de activos para poder facer fronte ás débedas contraídas. Esta folla de ruta tiña un período de carencia de 18 meses que vencía o pasado mes de xaneiro.

“Entre os recursos dispoñibles pola empresa e os que se espera acadar co plan comercial”, engadía a firma no seu comunicado do pasado mes de xaneiro, no que engadía que “a sociedade espera poder facer fronte a eses pagos”. “Non obstante”, explica, “a posibilidade de ter que afrontar imprevistos fai que sexa conveniente dotar de recursos adicionais á compañía, de xeito que unha achega de socios ou terceiros pola vía do aumento de capital sirva para fortalecer o patrimonio social e permitir atender a todas as obrigas da empresa”, recalca unha Euroespes que pactou Expedientes de Regulación Temporal de Emprego e vendeu a súa sede en Bergondo (agora actúa como arrendataria) a Tameinsa para cancelar a débeda que a súa principal filial tiña co Banco Santander.