Exolum anuncia un investimento de 100 millóns no Porto da Coruña para a súa terminal de combustibles sostibles.

Exolum afiña o paso en Langosteira. A compañía anunciou este xoves que está disposta a investir máis de 100 millóns de euros no proxecto que tramita no Porto da Coruña, para crear unha terminal de almacenamento de graneis líquidos cuxo obxectivo é almacenar tanto combustibles convencionais como sostibles, na liña dos novos proxectos de amoníaco ou metanol verde.

A compañía xa iniciou os trámites para lograr a concesión de terreo da Autoridade Portuaria na zona de Langosteira. “O proxecto está concibido como unha terminal de transición enerxética deseñada para adaptarse progresivamente á evolución do mercado, a normativa e a demanda industrial, e preparada para operar tanto con produtos convencionais como con combustibles sostibles, como o amoníaco renovable, o CO₂ capturado, o metanol verde, o SAF (Sustainable Aviation Fuel) e outros biocarburantes”, explica a compañía.

O enfoque contempla o desenvolvemento de “unha planta deseñada baixo estritos criterios de seguridade, eficiencia enerxética, automatización e sostibilidade ambiental distribuída en dúas parcelas diferenciadas pero conectadas, con unha capacidade total de aproximadamente 165.000 m3 repartidos en varios tanques (atmosféricos, crioxénicos e presurizados) preparados para almacenar combustibles de baixas emisións, produtos químicos, amoníaco e CO2”.

A proposta inicial inclúe un cargadoiro ferroviario de ancho ibérico con conexión directa á rede nacional, a conexión da terminal a dous atracamentos para buques mediante unha rede de tubaxes e bombas de gran capacidade e isletas de carga para camións cisterna, ademais de todos os sistemas auxiliares de operación e seguridade.

Combustibles

As actividades previstas abranguerían almacenamento, mestura e expedición de produtos como biodiésel, HVO (hidrobiodiésel), bioetanol, metanol, naftas, SAF (Sustainable Aviation Fuel), materias primas para biocombustibles e hidrocarburos tradicionais, así como operacións de blending destes produtos e a súa distribución multimodal.

“No caso do CO₂ crioxénico, contémplase a súa recepción e almacenamento en condicións presurizadas e refrigeradas e a súa expedición por vía marítima ou terrestre, con posibilidade de conexión futura por ducto. Respecto ao amoníaco, estúdase a súa chegada polas mesmas vías, o seu almacenamento intermedio en tanques crioxénicos e a súa distribución a través de distintos medios de transporte”, apunta Exolum.

Horizonte 2029

Explica a compañía que a complexidade do proxecto así como a tipoloxía de produtos a almacenar, moitos en desenvolvemento, avanzan unha posta en servizo escalonada da terminal, que iniciaría operacións en 2029 se todo sae segundo o previsto.

“Esta futura terminal convertería ao Porto da Coruña nun nodo loxístico de referencia tanto a nivel nacional como europeo, grazas á súa localización estratéxica en rutas cara ao norte de Europa, América, o sur do continente e Oriente Medio”, indica a compañía.