Hijos de Rivera prevé este ano un beneficio de 145 millóns, un 13% máis, aínda que reducirá os seus ingresos

Hijos de Rivera estima que, ao peche do actual exercicio, o beneficio consolidado antes do Imposto de Sociedades alcanzará os 144,67 millóns, un 13,23% máis que o rexistrado o ano anterior. Descontando os 34 millóns que a compañía prevé pagar por dito tributo, o beneficio neto ascendería a case 111 millóns, un 16,5 % por encima dos 95 millóns obtidos o ano pasado.

Así se desprende das previsións incluídas na Memoria de Impacto Positivo da compañía na que se detalla que dos 145 millóns de beneficio consolidado antes do imposto de sociedades, 145,34 procedería de España e 0,67 millóns do resto de países (Brasil, China, Estados Unidos, Filipinas, México e Portugal).

“No último exercicio, alcanzamos unha cifra de negocio récord na historia da nosa corporación, cumprindo así os obxectivos establecidos no noso Plan Estratéxico. Este fito non só reflicte o éxito das nosas marcas e a nosa xestión, senón que tamén nos motiva a seguir traballando coa mesma paixón e dedicación para afrontar os retos do futuro e seguir contribuíndo ao desenvolvemento das comunidades nas que estamos presentes”, explican no documento.

Outros datos

As inversións en mobilizado tamén se incrementarían neste exercicio pasando dos 170 millóns de 2024 aos 175. En canto ás subvencións de capital pasarían dos 2,6 millóns aos 2 mentres que as subvencións de explotación reduciranse ata os 0,065 millóns (0,155 millóns menos).

Por outra banda, a compañía capitaneada por Ignacio Rivera, estima que a produción pasará dos 789 millóns de litros aos 749.

Hitos do 2024

“Este ano seguimos avanzando no noso percorrido como unha corporación cervecera familiar especializada na produción, comercialización e distribución de bebidas. Este camiño que transitamos está marcado por unha busca constante da excelencia en todo o que facemos e por un firme compromiso con xerar un impacto positivo no noso contorno, sempre manténdonos fieis ao noso orixe”.

Entre os fitos destacados do 2024 a compañía destaca a posta en marcha da planta do polígono de Morás, que foi inaugurada o pasado xuño e que conta cunha capacidade produtiva de ata 110 millóns de litros.

Tamén destacan que superaron os 2.000 profesionais en plantilla e que “reduciron a fenda salarial da corporación” ao mesmo tempo que “seguen traballando para garantir a igualdade e a diversidade no equipo”.

O 2024 foi o ano no que, entre outros aspectos, renovaron a certificación Top Employer, que “avala a xestión do talento”, lanzaron a súa primeira cervexa de colleita propia (Lupia) e crearon a filial Estrella Galicia UK para impulsar o negocio no Reino Unido.