O grupo de Florentino Pérez leva ao Supremo o veto de Competencia por ‘amañar’ un concurso do Sergas

Unha pírrica sanción de 170.000 euros, apenas perceptible no balance de resultados de ACS, acabará dilucidándose no Tribunal Supremo pola perseveranza do grupo de Florentino Pérez, que conseguiu que a Sala do Contencioso admita a trámite dous recursos contra a Comisión Galega da Competencia. A entidade que preside Ignacio López-Chaves concluíu en novembro de 2024 que dúas filiais da compañía concertaran ofertas e incorreran en competencia desleal nun concurso público para a limpeza, desinfección e xestión de residuos de 56 centros de saúde e de atención continuada da provincia de Lugo. A investigación da entidade levou a unha multa económica de pequeno importe e á prohibición temporal de acceder a contratos públicos ás dúas sociedades sancionadas, a galega Samaín Servizos e a vasca Zaintzen. Ambas son filiais de Clece, a división de servizos que ACS tentou vender sen éxito, e que acaba de facerse con contratos valorados en máis de 50 millóns para os servizos de limpeza dos edificios da Xunta.

O equipo de Florentino Pérez, agora concentrado en saír airoso da crise deportiva e institucional do Real Madrid, recorreu primeiro ante o Tribunal Superior de Xustiza de Galicia para tentar tumbar o veto, pero recibiu unha sentenza desestimatoria en setembro do ano pasado. Finalmente, conseguiu levar o caso ata o Supremo, que en dous autos do pasado 25 de marzo admitía a trámite os recursos de Samaín Servizos e de Zaintzen.

O erro de Clece

As dúas filiais de Clece presentáronse ao concurso de servizos de limpeza dos centros de saúde e os PAC de Lugo, orzamentado en 5,5 millóns, pero un erro na presentación da documentación provocou a súa exclusión e, posteriormente, a sanción por infracción grave. A Comisión Galega da Competencia considerou acreditado que as empresas de ACS concertaran as ofertas, que non só se parecían moito entre si senón que mesmo cometeran o mesmo erro nun apartado, polo que a súa pretensión, deduciu, era alterar a valoración técnica do concurso. A sanción impúxose por competencia desleal, un «comportamento contrario á boa fe», segundo dicía a resolución de Competencia, que lesionou o interese público.

Para explicar a coordinación das ofertas, explicaba o organismo que Samaín e Zaintzen utilizaron os mesmos formatos en toda a documentación que presentaron (agás os logotipos); que ofertaron o mesmo número de horas para o persoal de limpeza en centros de baixa, media e alta utilización; e que cometeron o mesmo erro na presentación das súas ofertas nun dos centros de saúde, o de Illas Canarias en Lugo.

Competencia impuxo á filial galega de Clece unha multa de 54.659 euros e a prohibición de contratar durante seis meses na provincia de Lugo, mentres que a sanción a Zaintzen foi maior, 112.421 euros e sete meses de veto. Curiosamente, este foi o primeiro expediente sancionador que resolveu o organismo galego de Competencia despois da reprimenda xudicial que lle obrigou a reabrir a investigación do cártel de Monbus e Alsa no concurso de liñas regulares de transporte da Xunta.