Inditex roza os 40.000 millóns en vendas cun beneficio de 6.220 millóns, que medra un 6% en 2025
Tanto os ingresos como o resultado neto do xigante téxtil galego ralentizáronse o ano pasado fronte ao crecemento do exercicio precedente, cun avance que no caso da facturación cae a menos da metade.
Marta Ortega e García Maceiras na xunta de accionistas de Inditex
Comentarios
Para tranquilidade dos analistas, Inditex volveu cumprir cun avance nos seus números que levan ao xigante téxtil a pechar un 2025 con uns volumes de vendas e beneficios practicamente redondos. Case 40.000 millóns de ingresos e un beneficio que supera por primeira vez os 6.000 millóns. Con todo, os ingresos así como o resultado neto da compañía ralentizáronse fronte ao crecemento do exercicio precedente, cun avance que no caso da facturación cae a menos da metade.
A compañía comunicou á CNMV que as vendas medraron un 3,2%, ata 39.864 millóns de euros, “cunha evolución moi satisfactoria tanto en tenda como en liña, positiva en todos os formatos e, a tipo de cambio constante, en todas as zonas xeográficas”. As vendas a tipo de cambio constante medraron un 7,0%
O marxe e o beneficio avanzan
O resultado operativo (ebitda) medrou un 5%, ata 11.267 millóns de euros, e o ebit un 5,9%, ata 7.997 millóns de euros. O resultado antes de impostos (BAI) aumentou un 5,8%, ata 8.020 millóns de euros, mentres que o beneficio neto incrementouse un 6%, ata 6.220 millóns de euros, “sobre a base do sólido crecemento dos últimos anos”.
O marxe bruto situouse en 23.222 millóns de euros, un 3,9% superior ao de 2024, e representa o 58,3% das vendas. O control dos gastos operativos foi rigoroso”, destaca a compañía sobre un indicador que adoitan observar con detalle os analistas. Os gastos de explotación aumentaron un 2,8% respecto a 2024, por debaixo do crecemento das vendas.
Ralentización fronte a 2024
A ralentización das vendas e do beneficio é unha evidencia. As vendas medraran un 7,5%, ata 38.632 millóns de euros, en 2024. O marxe bruto situárase en 22.343 millóns de euros, un 7,6% superior ao de 2023, e representaba o 57,8% das vendas.
Frente ao avance do 6% do beneficio neto o exercicio pasado, un ano antes, en 2024, incrementouse un 9%, ata 5.866 millóns de euros. O resto dos parámetros do beneficio tamén tivera un crecemento maior. O resultado operativo (ebitda) medrou un 8,9%, ata 10.728 millóns de euros, e o ebit un 11,0%, ata 7.554 millóns de euros. O beneficio antes de impostos aumentou un 10,3%, ata 7.577 millóns de euros.
Sobre os resultados de 2025, Óscar García Maceiras, o conselleiro delegado, sinala que “estes resultados reflicten a capacidade dos nosos equipos para honrar a confianza que millóns de clientes depositan cada día nos nosos oito formatos comerciais”. “Conectar con eles, entender os seus desexos e ofrecer o mellor produto e unha experiencia diferencial é a base que sustenta a nosa expectativa de crecemento a longo prazo”, engade.
