Alcoa consegue unha axuda de 40 millóns para o forno de ánodos, a súa maior inversión en San Cibrao

• Alcoa, a piques de vender unha fundición pechada nos EE UU a un xigante do bitcoin para un centro de datos
• Alcoa recorta beneficios e ingresos no primeiro trimestre a pesar do prezo do aluminio e do reinicio de San Cibrao

No ano 2021, Alcoa chegou a un acordo cos traballadores para apagar durante dous anos as cubas de electrólise e conter as elevadas perdas da factoría de San Cibrao, que atribuía aos custos enerxéticos. Aquel pacto, que se reformulou en varias ocasións e que non logrou despexar a ameaza de peche sobre o complexo, conlevaba unha serie de investimentos que debía acometer a multinacional norteamericana en compensación pola redución das 228.000 toneladas de capacidade e polo cesamento das hostilidades do cadro, que tiña en marcha unha folga. A máis custosa era o forno de cocción de ánodos, que os traballadores consideraban clave para asegurar o futuro das instalacións.

Porén, dous anos despois, coa electrólise parada, a compañía que dirixe Bill Oplinger decidiu aprazar sine die a súa adquisición. O equipamento era moi caro, estimábanse uns 100 millóns de custo; e a inflación tivo dous efectos perniciosos na Mariña lucense: os prezos da enerxía estaban disparados e os investimentos nas instalacións requirían máis fondos. O carísimo forno continuou como unha das demandas dos traballadores, incluso tras o acordo con Ignis EQT, pero Alcoa nunca desbloqueou a inversión.

Agora o escenario cambiou. A multinacional con sede en Pittsburgh presentou o proxecto ao Perte de Descarbonización Industrial e o Goberno acaba de concederlle 40,4 millóns dos fondos europeos. Así consta na resolución provisional feita pública polo Ministerio de Industria das axudas para actuacións integrais destinadas á descarbonización da industria manufacturera. A subvención concedida, segundo consta na resolución provisional, destinarase á “descarbonización do proceso de cocción de ánodos na planta de San Cibrao“, é dicir, para a inversión estrela de Alcoa en Lugo e en España.

A compañía, por agora, non confirmou que vaia adquirir o desexado forno de cocción de ánodos, a pesar da axuda. A resolución do Perte é aínda provisional e o equipamento continúa sendo caro. En base ao orzamento subvencionable que consta no documento de concesión, Alcoa podería necesitar 135 millóns para adquirir o forno, bastante máis que os 100 millóns previstos inicialmente. O carácter provisional da axuda permite ás empresas presentar recursos, tanto se se lles negou a axuda como para tentar que se incrementen os fondos concedidos.

Gadisa e Papelera de Brandía

Ademais de Alcoa, dúas empresas conseguiron 16 millóns dos fondos europeos para realizar proxectos en Galicia. Unha é Intasa, filial de Gadisa e cabeceira da división madeireira da familia Tojeiro. Logra no Perte de Descarbonización 10,78 millóns para unha planta de recuperación e revalorización de residuos de biomasa na súa planta de San Sadurniño. A nova instalación custará uns 36 millóns.

Papelera de Brandía, a outra gañadora de axudas, obtén unha axuda de 5,3 millóns para a súa planta de Santiago, onde prevé investir 11,8 millóns.

Entre as subvencións concedidas destaca a recibida pola brasileira Votorantim, o grupo que engulíu a antiga Corporación Noroeste e que é propietaria da fábrica do Oural, en Sarria. Non é en Lugo onde o xigante do cemento investirá os fondos europeos. Consegue 128 millóns para o plan de descarbonización de Toral de los Vados, a súa factoría en León.