Roy Harvey, o expresidente de Alcoa que quixo pechar San Cibrao, entra no consello de ArcelorMittal
A siderúrxica proporá na súa xunta de accionistas a entrada no órgano de administración dun executivo, que chegou a vivir en Lugo coa súa familia na súa etapa como xefe do complexo, e que tamén pasou pola factoría agora pechada de Avilés.
Roy Harvey, presidente de Alcoa, nunha imaxe de arquivo
Comentarios
Novo destino para Roy Harvey, executivo americano que foi presidente de Alcoa a nivel mundial desde 2017 ata setembro de 2023 e que tivo un papel clave nas negociacións polo futuro da planta de San Cibrao cando en plena pandemia a compañía decidiu poñer en marcha un ERE na factoría de aluminio primario que, finalmente, sería rexeitado nos xulgados e que deu lugar a un proceso fallido de venda e á parada das cubas durante un período de dous anos. Agora, o directivo recalara no consello de administración doutra siderúrxica con gran presenza no norte de España, ArcelorMittal.
Tal e como adiantou La Nueva España, Arcelor convocou a súa xunta xeral de accionistas o próximo 5 de maio en Luxemburgo. Entre outras cuestións, os socios da compañía votarán a elección de Harvey como membro do consello de administración. Desde o xigante siderúrxico destacan que o norteamericano, de 52 anos, “conta con máis de dúas décadas de experiencia en postos de liderado internacional na industria metalúrxica e mineira, tendo desempeñado cargos directivos en operacións, finanzas, sustentabilidade e recursos humanos”.
Pasado no norte de España
Ao longo da súa traxectoria en Alcoa, Harvey logrou un amplo coñecemento do mercado español. O executivo, que chegou a ter na multinacional de Pittsburgh un soldo que rondaba os 10 millóns de dólares anuais, entrou en Alcoa en 2002 como analista empresarial e recalou en Lugo en 2007, cando foi nomeado director da planta.
Contan quen trataron con el na súa etapa lucense que, aínda que curta, o directivo garda un bo recordo. Harvey, que fala un castelán fluído, chegou a vivir en Lugo xunto coa súa familia. Posteriormente, en 2008 trasladaríase a Avilés, onde se encargou do departamento de asuntos financeiros da fundición de Alcoa agora pechada.
Negociacións co Goberno
O executivo tivo un papel moi activo nas negociacións co Goberno en 2020 e 2021, cando a compañía insistía en pechar ou vender a factoría de aluminio primario de San Cibrao, cuxas cubas acaban de ser agora reactivadas ao 100%, debido aos prezos eléctricos. Harvey mantivo encontros por videoconferencia coas entón ministras de Industria e Transición Ecolóxica, Reyes Maroto e Teresa Ribera, e chegou a negociar en Pittsburgh coa primeira.
No seu período como presidente de Alcoa tamén se produciu a venda das plantas do grupo en A Coruña e Avilés, que acabarían abocadas á quebra e peche en mans do polémico proxecto de Alu Ibérica, investigado pola Audiencia Nacional.
Harvey abandonou Alcoa en xaneiro de 2024, tras ocupar o seu cargo uns meses antes o actual presidente do grupo, Bill Oplinger. Cunha traxectoria de 19 anos na compañía, agora formará parte do consello de administración de Arcelor, que suma uns 5.000 traballadores entre as factorías de Xixón e Avilés.
