A Fundación Amancio Ortega inviste case oito millóns para erguer un centro de entidades sociais en Carballo
O Concello de Carballo agradece á Fundación Amancio Ortega o seu "firme compromiso co benestar" do concello tras anunciar a construción unhas instalacións que acollerán un centro de día para persoas con alzhéimer e un CIM.
Parcela de Carballo na que se situará un centro para entidades sociais / Concello de Carballo
Comentarios
A Fundación Amancio Ortega volcouse coas súas inversións. A entidade asinou este venres un acordo de colaboración co Concello de Carballo polo que a entidade asumirá íntegramente a construción e equipamento dun novo centro de referencia para entidades sociais, cun orzamento de 7,8 millóns de euros.
Mediante un comunicado, o consistorio explica que con esta actuación dáse resposta a unha demanda “histórica” das entidades sociais do municipio e da comarca de Bergantiños. “Queremos agradecer profundamente á Fundación Amancio Ortega o seu firme compromiso co benestar do noso municipio”, afirmou o alcalde, Daniel Pérez. “Con este convenio, Carballo dá un salto cualitativo histórico na atención social. Este novo edificio non é só unha infraestrutura de vangarda, senón que será o corazón no que se unificarán o coidado, a solidariedade e o apoio mutuo para todos os veciños de Carballo e da comarca de Bergantiños“, valora o rexedor do BNG.
Está previsto que o Concello de Carballo asuma en exclusiva a condición legal de promotor e a xestión integral do proceso construtivo, co compromiso de que as obras comecen nun prazo máximo de 18 meses.
Así será o edificio
O edificio deberá estar totalmente rematado e en funcionamento nun período máximo de catro anos, cun uso social e asistencial de maneira continuada durante un mínimo de 15 anos. A Fundación Amancio Ortega, pola súa banda, asumirá íntegramente o orzamento de construción e equipamento do centro.
O edificio situarase nunha parcela de propiedade municipal de 1.620 metros cadrados na rúa Vázquez de Parga, na confluencia coas rúas Darwin e Mendel.
O deseño do inmoble corre a cargo de LCG Estudio de Arquitectura, gañador do concurso de ideas convocado para este fin polo Concello de Carballo coa colaboración do Colexio Oficial de Arquitectos de Galicia (COAG).
Estas modernas instalacións están deseñadas para acoller servizos estratéxicos e asistenciais, entre os que destacan un centro de día para persoas enfermas de alzhéimer, o Centro de Información á Muller (CIM), novas instalacións para diversas entidades que traballan nos ámbitos da prevención de adiccións e da exclusión social, así como na atención ao autismo, entre outras realidades; ademais de espazos comúns e salas multiusos dispoñibles para as asociacións locais.
