Indra Group presenta o seu plan de crecemento e atracción de talento en Galicia
A compañía desgranará a súa estratexia de futuro na comunidade nun acto en Vigo, no que estará arroupada por Abel Caballero e representantes da Xunta e da Universidade de Vigo.
Comentarios
Indra deu reiteradas mostras de que a súa estratexia de crecemento pasa tamén por Galicia, un territorio onde está ben implantada en canto a emprego e centros de traballo; desenvolve importantes investimentos como o da fábrica de chips de Sparc; e é un socio tecnolóxico clave para a Xunta ou para grandes compañías como Abanca.
O próximo venres, 10 de abril, a compañía expoñerá os seus plans para profundar na súa relación con Galicia, presentando o seu plan de crecemento e atracción de talento na comunidade. A aposta de Indra en territorio galego vén de lonxe, pois xa suma 1.630 profesionais repartidos en oito centros, incluído o Centro de Excelencia de Santiago e pólos especializados en Vigo.
Convidados ilustres
Precisamente, será na cidade olívica, na sede de Afundación, onde o grupo presentará a súa estratexia arroupado por cargos políticos e institucionais. Está previsto que a xornada conte coa presenza do alcalde de Vigo, Abel Caballero; de representantes da Xunta de Galicia, entre eles a directora xeral de Formación e Cualificación para o Emprego, Zeltia Lado, e a directora xeral de Estratexia Industrial e Solo Empresarial, Margarita Ardao; así como de Natalia Caparrini, vicerreitora de Estudantado e Empregabilidade da Universidade de Vigo.
Nun comunicado, Indra indica que outros representantes do ámbito institucional, educativo e empresarial, ademais de membros do comité de dirección de Indra Group, participarán nun encontro que servirá para “poñer en valor o compromiso da compañía con Galicia como territorio clave para o desenvolvemento de capacidades tecnolóxicas avanzadas e a xeración de emprego cualificado e estable”.
A axenda do día
A xornada arrancará ás 11.30 horas na sede de Afundación (Policarpo Sanz) coa apertura institucional a cargo do alcalde de Vigo, Abel Caballero, e as intervencións de Natalia Caparrini, vicerreitora de Estudantado e Empregabilidade da Universidade de Vigo; e de María del Carmen Moneva, directora de Recursos Humanos de Indra Group. O evento permitirá posteriormente profundar no plan estratéxico da compañía e no plan de crecemento previsto na comunidade.
Antes do peche con Joaquín Ponz, o CTO de Indra; e Margarita Ardao, directora xeral de Estratexia Industrial e Solo Empresarial, haberá tempo para unha mesa redonda sobre oportunidades de emprego e desenvolvemento profesional, un dos temas centrais do acto. No debate participarán Zeltia Lado, directora xeral de Formación e Cualificación para o Emprego da Xunta; Rebeca Díaz, directora da Escola de Enxeñeiros de Telecomunicacións da Universidade de Vigo; Nana Silles, directora da área de Captación de Talento de Indra; e Jesús Ángel Sánchez, xerente de Relación con Universidades e Cátedras da compañía.
