A inversión de SAIC, ao detalle: montaxe completa en Ferrol e compoñentes de chasis e interior en As Pontes

A chegada da gran inversión automovilística chinesa a Ferrolterra toma forma a través do Diario Oficial de Galicia. A Secretaría Xeral de Industria somete xa a información pública o proxecto e o Estudo de Impacto Ambiental (EIA) do complexo industrial para a produción e distribución de vehículos eléctricos e híbridos, promovido por SAIC Motor Corporation Limited, declarado Proxecto Industrial Estratéxico. “O proxecto”, di o anuncio oficial de Economía, “concíbese cunha clara vocación de efecto tractor sobre o tecido industrial galego e europeo, asumindo o compromiso de cumprir cos requisitos de localización de fabricación de compoñentes establecidos pola Unión Europea”.

Entre os desenvolvementos industriais que SAIC prevé levar a cabo está a implantación de procesos clave de fabricación tales como as operacións de estampación, taller de carrocería e taller de pintura, que se prevé despregar progresivamente no porto exterior de Ferrol, en consonancia co desenvolvemento global do proxecto, así como outras actividades industriais noutras localizacións da comarca de Ferrol.

A proposta de SAIC en dúas fases

Mantén a proposta que, tendo en conta o desenvolvemento global do proxecto e as necesidades industriais, “SAIC Motor prevé o desenvolvemento progresivo doutras actividades industriais dentro do concello de As Pontes, con especial atención á fabricación de compoñentes para automoción e ás industrias auxiliares relacionadas (tales como compoñentes de interior, procesado de compoñentes de chasis, ensamblaxe, etcétera). Nunha primeira etapa, o proxecto industrial estratéxico limítase á posta en marcha dunha zona industrial no porto exterior de Ferrol.

O proxecto creará 1.000 postos de emprego directo, cun impacto no conxunto de Galicia de 2.000 empregos creados en total (1.000 empregos directos e outros 1.000 indirectos), tendo en conta as cadeas de valor da automoción e a loxística, entre outras, que se verán positivamente afectadas polo proxecto.

Mil empregos directos

Dos 1.000 postos de traballo directos, 460 postos estarán relacionados coas operacións loxísticas e 540 coas produtivas. Ademais destes números de creación de emprego directamente polo proxecto da implantación en Ferrol, tanto na fase de operación como de construción, prevese que as actividades industriais das empresas da cadea de subministración que se instalarían en As Pontes teñan un impacto positivo no emprego local, que se estimou preliminarmente en máis de 300 postos de traballo, “aínda que a magnitude real dependerá das decisións individuais de investimento, o desenvolvemento de negocio e os plans de execución de cada empresa da cadea de subministración”, segundo recolle o DOG.

En concreto, a descrición do proxecto pasa pola “implantación dun complexo destinado ao proceso de recepción e almacenaxe das diferentes pezas que conforman os vehículos, pezas de interiores e equipamento, chasis, carcasas exteriores, vidros etcétera, todo o necesario para poder levar a cabo o proceso de ensamblaxe completo dos vehículos”. Tras o montaxe realizaranse os controis de calidade, probas de funcionamento completo dos vehículos e expedición final.

De entrada, 197 millóns

A produción anual estimada, xa coñecida, é de 120.000 vehículos ao ano. “Correspóndese coa primeira etapa da actuación global de despregamento da empresa en Galicia, que se prevé que inclúa a fabricación doutros compoñentes na comunidade autónoma, así como a adquisición doutros elementos á industria local”, di o anuncio oficial. A inversión é de 197 millóns de euros.

Entre as principais instalacións da planta expoñen a configuración de edificios e as súas respectivas fases de desenvolvemento “para poder operar como unha planta industrial moderna, eficiente e aliñada cos principios da mobilidade sustentable”, cunha superficie total construída de 100.541 metros cadrados.

A primeira fase

A fase un configuraráse mediante espazos como un centro workshop (general assembly shop), edificio principal destinado a recibir as pezas rematadas, almacenar e ensamblaxe e produción dos automóbiles.

Haberá oficinas principais, distribuídas en dúas plantas (planta baixa e primeira planta), tamén un circuito de probas, espazo completamente exterior e delimitado onde, tras a finalización do montaxe, levaranse os automóbiles para realizar as probas e test oportunos e así verificar o correcto funcionamento.

Tamén haberá almacenaxe exterior de vehículos rematados, lugar completamente exterior e acondicionado onde quedarán almacenados os vehículos tras a realización con éxito das probas e test.

A segunda fase

Na fase dous erguerase un almacén que se destinará ao almacenamento de mercadorías e das pezas que compoñen os vehículos, para a súa posterior incorporación ás liñas de produción. Tamén está prevista a ampliación do workshop: seguindo as necesidades de espazo destinado ao almacenaxe proxéctase para conectar este centro cos novos espazos onde se almacena a mercadoría e pezas que compoñen os vehículos, para a súa posterior introdución nas liñas de produción.

Tamén haberá unha estación de reposición para o consumo propio, consistente en dous depósitos aéreos de 10.000 litros cada un deles e dous surtidores, previstos para dotar dun mínimo de combustible os vehículos híbridos fabricados listos para ser expedidos do complexo.

De forma esquemática, o proceso completo segue esta secuencia: