Naturgy, Capital Energy e Tasga inician a carreira por unha hidroeléctrica de bombeo no río Tambre

Augas de Galicia, organismo dependente da Consellería de Medio Ambiente, acaba de abrir o trámite de competencia de proxectos do expediente de solicitude dunha concesión de augas no río Tambre, co obxecto de abastecer unha central hidroeléctrica reversible. Segundo a documentación publicitada este mércores no Diario Oficial de Galicia (DOG), as tres empresas que, ata o momento, se interesaron nesta captación teñen un mes para presentar as súas propostas, aínda que tamén poden adherirse ao proceso nesta fase outras promotoras. Por agora, sobre a mesa, figuran os nomes de Naturgy, Capital Energy e Tasga.

En concreto, segundo a información publicitada no DOG, as empresas que, agárdase, presenten os seus proxectos técnicos son Green Capital Power, filial da madrileña Capital Energy, Espiral Renovables, da galega Tasga, e Naturgy Xeración, da multinacional de Francisco Reynés.

O proceso ábrese despois de que Capital Energy solicitase para este almacenamento hidráulico de enerxía un caudal de auga de 47.000 litros por segundo. Os concellos afectados polo proxecto son Brion, Negreira, Lousame.

Proceso longo

O interese das compañías en erguer unha hidroeléctrica de bombeo no Tambre vén de lonxe. En 2023, Augas de Galicia xa indicou que dúas empresas, Capital Energy e Tasga, querían erguer unha megabatería que usaría como depósito inferior o encoro de Barrié de la Maza, no río Tambre.

Ao contrario das convencionais, as hidroeléctricas de bombeo unen dúas balsas de auga a distinta altura. Nas horas val, nas que existe menor consumo eléctrico, a enerxía úsase para elevar a auga do depósito inferior ao superior para que, unha vez que se alcance o pico de demanda, o caudal se mova, de novo, xerando enerxía eléctrica.

Ocorre que o encoro de Barrié de la Maza é explotado por Naturgy desde a súa posta en funcionamento, polo que, o pasado ano, os servizos xurídicos da Xunta determinaron que os de Francisco Reynés tiñan prioridade, se así o quixesen, para facer uso deste novo aproveitamento.

A enerxética decidiu entrar na pugna, algo que obrigaba tamén ás outras dúas firmas a reformular os expedientes presentados ante Augas.

As outras apostas de Naturgy

Ao estar o proceso, neste momento, en fase de trámite de competencia, as tres compañías foron moi discretas cos proxectos que presentarán e que, de momento, non poderán coñecer ata dentro dun mes.

Naturgy estuda outros tres proxectos de bombeo na comunidade. Un en Filgueira, en fase de trámite concesional, neste caso, coa Confederación Hidrográfica Miño-Sil, e que propón aproveitar para unha das balsas do proxecto o actual encoro de Frieira.

Outro en Lugo, o Belesar II, que uniría os encoros de Belesar e Peares, en Chantada, e un terceiro en Ourense, cunha central vinculada ao encoro de Albarellos, entre os concellos de Avión, Carballeda de Avia e Leiro.

Tasga

Doutra banda, Tasga promove unha central de bombeo que terá unha das súas captacións de auga no lago mineiro de Meirama. Recentemente, Transición Ecolóxica designou o mesmo como adxudicatario do concurso público para a concesión de capacidade de acceso de evacuación á rede de enerxía eléctrica de instalacións de xeración renovable nese nodo de transición xusta.

Capital Energy tamén presentou proxecto, no seu momento, para erguer unha hidráulica de bombeo en Meirama, aínda que a súa proposta foi rexeitada por Augas.