Norvento dá o salto e lanza ao mercado os seus conversores de alta potencia.

Norvento segue sumando. A enerxética galega anunciou este martes o lanzamento de nXL. Trátase dunha nova familia de conversores de enerxía de alta potencia deseñada para facilitar a integración de tecnoloxías limpas en proxectos a gran escala.

A firma lucense, que acumula máis de 40 anos de experiencia en toda a cadea de valor das enerxías renovables, canaliza esta aposta a través da súa nova marca, Norvento TECHnPower. Con este movemento, a compañía asegura que esta filial entra “de cheo” no “mercado de produtos a escala de rede, ata agora especializada no sector do autoconsumo comercial e industrial”.

Estes novos equipos, deseñados e fabricados integramente por Norvento TECHnPower en España, estarán destinados a instalacións que producen electricidade en grandes cantidades e a distribúen a través das redes eléctricas para abastecer a fogares, empresas e industria así como a grandes consumidores de enerxía, como os centros de datos.

Segundo explica a compañía a través dunha nota de prensa, estes conversores “destacan pola súa capacidade para operar tanto en sistemas conectados á rede eléctrica como en ambientes illados, e pola súa habilidade para cambiar sen cortes de subministración entre distintos modos de funcionamento. Esta flexibilidade permite a súa aplicación en proxectos que requiren continuidade enerxética e adaptación a distintos ambientes operativos”.

As particularidades de nXL

Neste sentido, a gama nXL é compatible con plantas solares fotovoltaicas, sistemas de almacenamento con baterías (BESS), electrolizadores para hidróxeno verde, infraestrutura portuaria (OPS), catenarias ferroviarias e sistemas de control de rede. “Ademais, o seu deseño compacto e a súa alta densidade de potencia permiten optimizar o espazo e reducir custos operativos”, destaca a empresa, que apunta aos centros de datos como un dos mercados target.

“Os conversores nXL de Norvento TECHnPower ofrecen unha fonte de enerxía segura e adaptable, grazas á súa integración directa con baterías que cubren picos de demanda ou posibles cortes. Así mesmo, grazas ao seu sistema de refrigeración estanco, a familia de conversores nXL é apta para zonas desérticas, áreas de alta corrosión próximas ao mar ou de temperaturas moi extremas, e mesmo en zonas con partículas condutoras presentes no aire, como minas e zonas volcánicas”, apuntan desde Norvento.

Ademais, esta familia de conversores fabricarase en neFO, a fábrica autosuficiente e neutra en emisións que Norvento está construíndo en Lugo. Nela concentrarase boa parte dun investimento en I+D que se moverá á alza nos próximos anos.

“Desde Norvento estamos moi ilusionados de poder anunciar o lanzamento da nosa nova familia de conversores nXL, un fito que reúne todo o coñecemento e saber facer de Norvento, quen acumula máis de 40 anos de traxectoria no sector e 15 como fabricante. Coa gama nXL desenvolvemos unha familia de conversores bidireccionais que combina a maior densidade de potencia do mercado cunha capacidade multiuso”, sinalou Álvar Mayor Miguel, director de Innovación de Norvento TECHnPower.

Na opinión do directivo de Norvento, trátase de “equipos capaces de operar tanto en rede como en ambientes illados, e de transitar sen cortes entre distintos modos de funcionamento, o que lles permite adaptarse a aplicacións moi diversas: desde plantas fotovoltaicas e sistemas BESS, ata electrolizadores de hidróxeno, centros de datos ou infraestrutura portuaria. Todo iso cun deseño compacto, robusto e preparado para ambientes extremos, deseñado e fabricado integramente en España”,